АНУ-ын Ерөнхийлөгч Доналд Трамп олон талт хамтын ажиллагаанаас татгалзаж байгаагаа НҮБ-ын Ерөнхий Ассамблейн индэр дээрээс илэрхийллээ.

Мөн тэрбээр мэдэгдэлдээ Иран, Венесуэлийн баримталж байгаа бодлогыг шүүмжилсэн байна. 34 минут үргэлжилсэн мэдэгдлээрээ Дональд Трамп Иран, Венесуэлээс гадна Герман тэргүүтэй олон улсыг шүүмжилжээ. Тэрбээр олон талт хэлэлцээрээс татгалзаж, глобалчлалыг дэмжихгүй гэдгээ онцолсон бөгөөд АНУ НҮБ-ын Цагаачлалын гэрээ, Хүний эрхийн хорооноос гарах болсныг мэдэгдсэн юм. Үүнээс гадна 2016 онд Ерөнхийлөгчөөр сонгогдсоноос хойш түүний засаг захиргаа АНУ-ын түүхэн дэх аль ч Засгийн газраас илүү үр дүнд хүрсэн гэж мэдэгджээ.

Дональд Трамп НҮБ-ын Ерөнхий Ассамблейн 73 дугаар чуулганы үеэр “Олон улс орнуудын дэмжлэгээр бид өнөөдөр БНАСАУ-тай харилцаагаа шинэ түвшинд гаргах боломжтой болж байна. Хэдийгээр цаашид хийх ажил их байгаа ч өнөөг хүртэл хийсэн алхамд нь БНАСАУ-ын удирдагч Ким Чен Унд талархаж байна. Хэдий тийм боловч БНАСАУ цөмийн хөтөлбөрөө бүрэн зогсоох хүртэл хориг арга хэмжээ үргэлжилнэ. Харин Иран улсын хувьд цөмийн хэлэлцээр байгуулснаас хойш тус улсын батлан хамгаалахын төсөв 40 хувиар нэмэгдсэн. Ираны Ерөнхийлөгч цөмийн пуужин хөгжүүлж, улсдаа дарангуйлал тогтоон, санхүүгийн терроризм болон Сири, Йеменд болж байгаа зэвсэгт мөргөлдөөнийг санхүүжүүлж байна” гэдгийг онцолсон байна

Дональд Трампын мэдэгдлийн хариуд Ираны Ерөнхийлөгч Хасан Рухани “АНУ хууль бус, нэг талыг баримталсан хориг тавьснаар эдийн засгийн терроризм үйлдэж, хөгжил дэвшилд хүрэх замд саад болж байна. Шинэ хориг арга хэмжээний хүрээнд АНУ-ын эхлүүлсэн худалдааны дайн зөвхөн Ираны иргэдэд төдийгүй дэлхийн бусад улс орны ард иргэдэд ч халтай” хэмээжээ.

Дональд Трамп Ерөнхий Ассамблейн чуулганд хэлсэн үгэндээ БНХАУ-ын бараа, бүтээгдэхүүнд ногдуулсан тариф нь дотоодын үйлдвэрлэлийг хамгаална гэж онцолсон байна. Мөн цаашид шударга бус худалдааг хүлээн зөвшөөрөхгүй гэсэн байр сууриа баталгаажуулжээ. Харин улс орнуудын хувьд хоёр том гүрний хооронд өрнөж байгаа маргаан дэлхийн эдийн засагт сөргөөр нөлөөлнө гэж болгоомжилж байгаа юм.

Үүнээс гадна Ерөнхийлөгч Дональд Трамп газрын тосны ханшийн өсөлтөд OPEC-ийг буруутгасан байна. Тэрбээр OPEC-ийн гишүүн орнууд АНУ-ын хамтын ажиллагаа, цэргийн хамгаалалтын төлөө төлбөр төлөх хэрэгтэй гэж үзэж байгаа аж.

АНУ-ын Ерөнхийлөгч Дональд Трамп “Дэлхийн худалдааны системд томоохон өөрчлөлт хийх шаардлагатай байгаад олон улс орнууд санал нэгдэнэ. БНХАУ улс Дэлхийн худалдааны байгууллагад нэгдсэнээс хойш АНУ-д гурван сая ажлын байр үгүй болж, 60 мянган үйлдвэр хаалгаа барьсан. Бид үүнийг хүлээн зөвшөөрөхгүй. Бид саяхан БНХАУ-ын 200 тэрбум ам.долларын бараа, бүтээгдэхүүнд тариф ногдуулсан. Хэдийгээр би БНХАУ-ын Ерөнхийлөгч Ши Жиньпинтэй эв найрамдалтай харилцаатай ч худалдааны тэнцвэргүй байдлыг хүлээн зөвшөөрч чадахгүй. Түүнчлэн OPEC-ийн гишүүн орнууд дэлхийн бусад улс орнуудад шударга бус хандаж байна. Тэд газрын тосны үнийг бууруулж, одооноос батлан хамгаалах салбарт хөрөнгө оруулах хэрэгтэй гэж би үзэж байна” хэмээжээ

С.Өлзийбуян

Холбоо барих: ulziibuyan.s@bloombergtvmongolia.com

uyanga.m@bloombergtvmongolia.com