48 дахь удаагийн Дэлхийн эдийн засгийн чуулган "Талцсан дэлхий ертөнцөд хамтын ирээдүйг цогцлоох нь" сэдвийн хүрээнд амжилттай болж өндөрлөлөө. Даяаршлыг дэмжсэн чуулганд АНУ-ын Ерөнхийлөгч Дональд Трамп бодлогоо хэрхэн хамгаалах нь ихээхэн анхаарал татаж байлаа. Дональд Трамп АНУ хөрөнгө оруулалтын хамгийн таатай орчин болсон гэдгийг онцлоод “Бизнес эрхлэгчдэд нээлттэй бодлого баримтална” гэдгийг Давосын индэр дээрээс албан ёсоор зарлав. Мөн “Шударга бус худалдааны харилцааг хүлээн зөвшөөрөхгүй” гэдгээ илэрхийлж, “Дэлхийд тэргүүлэх эдийн засгийн хувиар АНУ чөлөөт худалдааг дэмжинэ” гэж мэдэгдсэн юм. Дональд Трамп энэ удаагийн чуулганд оролцсоноор 2000 оноос хойш Давост хүрэлцэн ирсэн АНУ-ын анхны Төрийн тэргүүн боллоо. Тэрбээр “АНУ-ын Ерөнхийлөгчийн хувьд би улсаа үргэлж нэгдүгээрт тавина. Гэхдээ АНУ-ыг тэргүүнд тавина гэдэг нь олон улсаас тусгаар байна гэсэн үг биш. Дэлхийн тэргүүлэх эдийн засаг хөгжинө гэдэг нь дэлхий ертөнц ч мөн хамтдаа хөгжинө гэсэн үг. АНУ-ын хөгжил цэцэглэлт дэлхий дахинд олон сая ажлын байр бий болгоод зогсохгүй, эндээс эхтэй инноваци, ололт амжилтууд илүү эрүүл, хүн бүрд өгөөжтэй ертөнцийг бий болгоход тусална. Үүнээс гадна АНУ чөлөөт худалдааг дэмжинэ. Хэдий тийм боловч худалдааны хэлэлцээр нь талуудад шударгаар үйлчилж байх ёстой. АНУ цаашид шударга бус эдийн засгийн харилцааг хүлээн зөвшөөрч чадахгүй. Үүнд оюуны өмчийн хулгай, үр ашиггүй эдийн засгийн төлөвлөлт багтана. Энэ мэт шударга бус нэг талд илт давуу тал өгөх харилцаа нь олон улсын зах зээл, бизнесийн орчинд сөргөөр нөлөөлж байна” гэж мэдэгдлээ.

Үүнээс өмнө Энэтхэгийн Ерөнхий сайд Нарендра Моди Дэлхийн эдийн засгийн чуулганы хэлэлцүүлгийг нээж үг хэлэх үедээ “Даяаршлын цар хүрээ хумигдаж байгаа”-г анхааруулсан юм. Түүнчлэн уур амьсгалын өөрчлөлт, терроризм, даяаршлын эсрэг үзлийг дэлхий дахины өмнө тулгамдаж байгаа гурван сорилтоор нэрлэлээ. Энэ оны Давосын чуулганд даяаршлыг дэмжих үзэл голлож, худалдааны хориг саад бий болгохыг шүүмжилсэн өнгө аяс давамгайлсныг олон улсын ажиглагчид онцолж байна. Мөн уур амьсгалын өөрчлөлт, хүйсийн тэгш байдал, хөдөлмөрийн зах зээл болон технологийн хөгжлийг хөндсөн юм.

Францын Ерөнхийлөгч Эммануэль Макрон улсаа Европын тавцанд дахин хүчирхэгжин гарч ирснийг зарлалаа. Мөн тэрбээр Францыг уур амьсгалын өөрчлөлтийн эсрэг тууштай тэмцдэг жишиг улс болгохыг зорьж байгаагаа мэдэгдсэн юм. Харин Германы Канцлер Ангела Меркель “Олон улсын тулгамдсан асуудлуудыг шийдэхэд их гүрнүүдийн хамтын ажиллагаа чухал шаардлагатай”-г мэдэгдэлдээ дурдлаа.

Их Британийн Ерөнхий сайд Тереза Мэй "Их Британи Европын Холбооноос гарсан ч чөлөөт худалдаагаар тэргүүлэгч их гүрэн хэвээр байна" гэдгийг чуулганы индэр дээрээс зарласан юм. Харин Канадын Ерөнхий сайд Жастин Трюдо “Транс-Номхон далайн хэлэлцээр АНУ-гүйгээр урагшилна” гэдгийг анхааруулжээ.

Үүнээс гадна Дэлхийн эдийн засгийн чуулган дэргэдээ кибер аюулгүй байдлын төв байгуулсан нь энэ удаагийн чуулганы онцлох үйл явдлуудын нэг байлаа. Ирэх гуравдугаар сараас нээлтээ хийснээр энэ төв цахим аюулгүй байдлыг хамгаалахад Засгийн газар, бизнесийн төлөөлөл, шинжээчдийн үйл ажиллагаанд дэмжлэг болно гэж мэргэжилтнүүд үзэж байгаа юм.

Б.Ариунболд

Холбоо барих: ariunbold.b@bloombergtvmongolia.com

minjma.g@bloombergtvmongolia.com