Тансаг зэрэглэлийн автомашины салбарт тэргүүлэгч Германы гурвал буюу “BMW” (BMW:GR), “Daimler” (DAI:GR) болон “Audi” (NSU:GR) компаниуд “Nokia”-ийн газрын зургийн "HERE" үйлчилгээг 2.7 тэрбум еврогоор авахаар болсон гэж эх сурвалжууд мэдээллээ. Гэхдээ талууд эцсийн тохиролцоонд хараахан хүрч амжаагүй байгаа юм байна.

“Nokia” компани өнгөрсөн 4-р сард газрын зургийн бизнесээ худалдахаар болсон. Энэ үед технологийн салбарт цахиур хагалж байгаа “Uber” болон “Google” (GOOG:NASDAQ) компани "HERE"-ийг худалдан авах сонирхолтой байгаа талаар мэдээллүүд гарч байсан юм.

Харин Германы компаниуд 20-р зуунаас эхэлсэн автомашины салбарын тэргүүллээ алдахгүйн тулд түншлэл байгуулан, технологийн компаниудтай өрсөлдөхөөр шийдвэрлэсэн нь ийнхүү үр дүнд хүрч байгаа бололтой. Хойд Америк болон АНУ-ын автомашинуудад хэрэглэгдэж байгаа газрын зургийн үйлчилгээний 80 хувийг “HERE” хангадаг. Тиймээс энэ үйлчилгээг худалдан авах нь хэрэглэгчдийн мэдээллийг “Google”-ээс нууцлах боломжийг бүрдүүлж байгаагаас гадна автомат жолоодлогын технологийн суурийг баталгаажуулж байгаа юм.

Учир нь “Google” болон “Mercedes-Benz” тэргүүтэй Германы компаниудын хөгжүүлж байгаа автомат жолоодлого нь интернет орчинд хандаж байж ажиллах учиртай юм. Сонирхуулахад, “HERE”-ийг Nokia компани 2008 онд 8.1 тэрбум ам.доллараар худалдан авч байсан байна.

Д.Хаш-Эрдэнэ

Холбоо барих: KhashErdene.D@bloombergtvmongolia.com

Anu.G@bloombergtvmongolia.com