2022 оны эхний дөрвөн сард агаарын тээврээр 374 сая ам.доллартой тэнцэх бараа, бүтээгдэхүүн экспортолсон нь өмнөх оны мөн үеэс 359 хувиар өссөн үзүүлэлт боллоо.

Харин агаарын тээврээр импортолсон бараа, бүтээгдэхүүн 184 сая ам.доллар болж, өмнөх оны мөн үеэс 65 хувиар өссөн байна.

Цар тахлын хязгаарлалтын үед нислэгүүд хязгаарлагдмал байсан бол энэ онд нислэгийн давтамж, чиглэлүүдийг нэмэгдүүлэх зэргээр эрчимтэй арга хэмжээ авч байгаа юм.

ОХУ-ын эсрэг хориг арга хэмжээнүүд болон БНХАУ-ын COVID-19-ийн хязгаарлалтын асуудлаас шалтгаалан авто болон төмөр замын тээвэр сааталтай байна. Тиймээс Монгол Улсын хувьд агаарын тээвэр чухал гарц болохоор байгаа юм.

Төмөр замын тээврийн хувьд экспорт 873 тэрбум ам.доллар болж, өмнөх оны мөн үеэс 13 хувиар буурчээ. Харин авто замын тээврийн экспортын хэмжээ 1.5 тэрбум ам.доллар болж, өмнөх оны мөн үеэс 10 хувиар өссөн байна.

Геополитик болон цар тахлаас шалтгаалсан тээвэр логистикийн асуудал ирэх 5-8 жилд ч үргэлжлэх магадлалтай гэж Монголын логистикийн холбооны Ерөнхийлөгч А.Мөнхболд мэдээлж байсан юм.

М.Аминаа

Холбоо барих: aminaa.m@bloombergtvmongolia.com

minjma.g@bloombergtvmongolia.com