Барилга байгууламж барих хүсэлт гаргасан тохиолдолд “Газар эзэмших, ашиглах эрхийн гэрчилгээний дуудлага худалдааны анхны үнийг төлүүлэх тухай” Нийслэлийн Засаг даргын захирамж хэрэгжээд дөрвөн сар өнгөрч байна. Энэ хугацаанд Нийслэлийн Ерөнхий төлөвлөгөөний газарт 380 иргэн, хуулийн этгээд нийт 307.5 га газарт барилга барих зөвшөөрөл хүссэн өргөдөл ирүүлсэн байна. Эдгээрт захирамжийн дагуу лавлагааны хуудас гарган өгч, 70 иргэн, аж ахуйн нэгжид нийт гурван тэрбум 33.9 сая төгрөгийн дуудлага худалдааны анхны үнийг ногдуулан нэхэмжилжээ. Эдгээрээс одоогийн байдлаар 47 иргэн, аж ахуйн нэгж, байгууллага газрын дуудлага худалдааны анхны үнийг төлж, нэг тэрбум 655.1 сая төгрөгийг төсөвт төвлөрүүлээд байна. Түүнчлэн “Газрын харилцааны талаар авах зарим арга хэмжээний тухай” Нийслэлийн засаг даргын захирамжийн хүрээнд 2003 оноос хойш төрийн байгууллагад иргэн, хуулийн этгээдтэй хамтруулан олгосон газар эзэмших эрхүүдэд судалгаа хийжээ. Энэ хүрээнд газар эзэмших гэрээ, гэрчилгээ бичигдээгүй 31 иргэн аж ахуйн нэгжийн газар байгааг тогтоосон байна. Нийслэлийн өмчийн харилцааны газраас эдгээр газар эзэмших эрхийг хүчингүй болгох саналтай байгаа юм. Үүнээс гадна газрын дуудлага худалдааны анхны үнэ төлөх тухай мэдэгдлийг хүлээж авахаас татгалзсан таван иргэн, аж ахуйн нэгжийн газар эзэмших эрхийг хүчингүй болгожээ. Мөн холбоо тогтоож чадаагүй 49 иргэн, аж ахуйн нэгжийг тодорхой заасан хугацаанд газрын дуудлага худалдааны анхны үнэ төлөөгүй тохиолдолд, газар эзэмших эрхийг хүчингүй болгохоор шийдвэрлэсэн байна.

Б.Батманлай

Холбоо барих: Batmanlai.b@bloombergtvmongolia.com

Tsatsralt.b@bloombergtvmongolia.com