Гуравдугаар сарын байдлаар гадаад худалдааны нөхцөлийн индекс өмнөх сараас 11.1 хувиар өсөж, 199.1 нэгж болсныг Үндэсний статистикийн хороо мэдээллээ.

Гадаад худалдааны нөхцөлийн индекс өмнөх оны мөн үетэй харьцуулахад 19.8 хувиар өссөн байна. Гадаад худалдаанд гол жин дардаг эрдэс бүтээгдэхүүний үнэ ханш дэлхийн зах зээлд өссөнөөр индексийн өсөлтийн хурд сүүлийн хоёр сард эрчимжжээ.

Энэ дундаа гуравдугаар сард экспортын үнийн индексийн өсөлт гол нөлөө үзүүлсэн байна. Тухайлбал: гуравдугаар сарын эцсийн байдлаар экспортын үнийн индекс 235 нэгж болж, өмнөх сараас 12.9 хувиар, жилийн өмнөхтэй харьцуулахад 36.8 хувиар өсжээ.

Өсөлтийн дийлэнх хэсгийг эрдэс бүтээгдэхүүний бүлэг буюу зэсийн баяжмал, чулуун нүүрс, түүхий нефтийн үнэ нэмэгдсэнээр тайлбарлагдаж байна.

Импортын үнийн индексийн өсөлтийн хурд саарч, өмнөх сараас 1.6хувиар өсөж 118 нэгж болжээ. Үүнд импортоор худалдан авч буй нефтийн бүтээгдэхүүний үнэ 10.4 хувь, цаас картон тэдгээрээр хийсэн бүтээгдэхүүний үнийн индекс өссөнтэй холбоотой болохыг Үндэсний статистикийн хороо мэдээллээ.

З.Энхболор

Холбоо барих: enkhbolor.z@bloombergtvmongolia.com

minjma.g@bloombergtvmongolia.com