“Starlink” компани Монгол Улсад үйлчилгээгээ үзүүлж эхлэхэд багагүй хугацаа шаардлагатай байгаагаа мэдэгдсэнийг Цахим хөгжил, харилцаа холбооны яамны Төрийн нарийн бичгийн дарга Б.Болор-Эрдэнэ цахим хуудастаа бичжээ.

Монгол Улсын газар нутгийн онцлогоос шалтгаалан хэд хэдэн газрын станц байгуулах шаардлагатай байгаа нь үүнд нөлөөлөхийг онцолсон байна.

Тэрбумтан Илон Маскийн санаачилсан “Starlink” интернэт үйлчилгээ нь 2023 оноос эхлэн Монголд үйл ажиллагаа явуулахаа сайт дээрээ мэдэгдээд байгаа юм. “Starlink” үйлчилгээ Монголд нэвтэрснээр хөдөө орон нутаг, алслагдсан бүс нутаг, мөн аялал, жуулчлалын бүсэд интернэт сүлжээ нэвтрүүлэх давуу тал бий болохоор байгаа юм.

Үүнээс гадна Цахим хөгжил, харилцаа холбооны Сайдын үүрэг гүйцэтгэгч Л.Энх-Амгалан гадаадын интернэт үйлчилгээ үзүүлэгчид Монголд үйлчилгээ үзүүлэхэд нээлттэй гэдгийг мэдэгдээд байна.

Дашрамд дурдахад: Харилцаа холбооны зохицуулах хороонд “Starlink” компаниас тусгай зөвшөөрөл авах хүсэлт ирээгүйг тодотгож байна.

Ж.Зоригт | @TeraReader

Холбоо барих: zorigt.j@bloombergtvmongolia.com

minjma.g@bloombergtvmongolia.com