БНХАУ-ын нийслэл Бээжин хотод COVID-19-ийн “Omicron” хувилбарын анхны тохиолдол бүртгэгдсэн байна. Бээжин хотноо болох өвлийн Олимпын наадам эхлэхэд гурван долоо хоног хүрэхгүй хугацаа үлдээд байгаа юм.

Үүнээс гадна Шанхай, Шэньжэнь, Тяньжинь зэрэг БНХАУ-ын томоохон хотуудад COVID-19-ийн “Omicron” хувилбарын халдварын хэд хэдэн тохиолдол бүртгэгдсэн байна. Иймд Сар шинийн баяр, Бээжингийн Олимпын наадмаас өмнө халдварын давлагааг яаралтай дарах шаардлага үүсээд байна. Хэдий тийм боловч халдварын голомт болоод буй Шиань хотод өдөрт бүртгэгдэх тохиолдол буурч байгаагаас хязгаарлалтын арга хэмжээгээ сулруулж эхлээд байгаа аж.

Харин Европын Холбооны улсуудын хувьд вакцинд хамрагдаагүй иргэдэд арга хэмжээ авч эхэллээ. Тухайлбал: Австри улс гуравдугаар сараас эхлэн вакцинд хамрагдаагүй иргэдэд торгууль оноож эхлэхээр төлөвлөөд байна. Вакцин хийлгэхээс татгалзсан иргэдэд 3600 хүртэлх еврогийн торгууль ногдуулна гэж мэдэгджээ.

Үүнээс гадна Франц улс вакцинд хамрагдаагүй 16-аас дээш насныхныг олон нийтийн газраар үйлчлүүлэхийг хориглолоо. Тус улс иргэдээс шинжилгээний “Сөрөг” хариунаас үл хамааран вакцинд хамрагдсан байхыг шаардахаар болж байна.

М.Аминаа

Холбоо барих: aminaa.m@bloombergtvmongolia.com

minjma.g@bloombergtvmongolia.com