Өнгөрсөн долоо хоногт “Газар тариалангийн бодлогыг шинэчлэх, экспортлох нүүрсний хэмжээг нэмэгдүүлэх, утаатай тэмцэх ажлын нарийвчилсан төлөвлөгөө гаргах зэрэг асуудалд төвлөрч ажилласан"-ыг “Ерөнхий сайдын 30 минут”-ын уулзалтаар Ерөнхий сайд Н.Алтанхуяг онцоллоо. 2013 онд Монгол Улс 18 сая тонн нүүрс экспортолсон бол энэ жил бараг хоёр дахин нэмж, 34 сая тоннд хүргэхээр зорьж байгаа. Монгол Улсын Засгийн газраас зарласан үйлдвэржилтийн төслийн урьдчилсан шалгаруулалт "Хөгжлийн банк"-нд хийгдэж байгаа бөгөөд ирэх долоо хоногт эхний шатны дүнг танилцуулна. Төрийн бодлогын дэмжлэгээр зах зээлд хямд үнийн жишиг тогтоож буй Буянт-Ухаа орон сууцны хороололд иргэдээс захиалга авах журмыг Засгийн газрын хуралдаанаар хэлэлцэж шийдвэрлэнэ гэж Ерөнхий сайд Н.Алтанхуяг хэлсэн байна. Түүнчлэн нефть импортлогчид шатахууны жижиглэн худалдааны үнийг 90 хүртэл төгрөгөөр нэмсэн талаар “Үнэ тогтворжуулах бодлогын хүрээнд шатахууны үнэ өнгөрсөн жил өсөөгүй, харин ч 50 төгрөгөөр буурсан. Өнөөдрийн хувьд үнэ бага зэрэг хөдлөхийг Засгийн газраас хянахгүй байгаа. Харин 90 төгрөгөөр нэмэгдэх үндэслэл байхгүй энэ талаар тодруулна” гэв. 

Холбоо барих: minjma.g@bloombergtvmongolia.com