АНУ-ын Холбооны Нөөцийн Банкны хэрэгжүүлж байгаа бондын хөтөлбөрийн үр дүнд “Apple”-аас эхлээд “Verizon Communications” зэрэг АНУ-ын компаниудын хүүгийн төлбөрт төлөх мөнгө ойролцоогоор 700 тэрбум ам.доллараар буурчээ. Сүүлийн дөрвөн жилийн хугацаанд компаниудын бондын өгөөж дунджаар 4.6 хувь болж буурсан байна. Харин “Lehman Brothers” дампуурахаас өмнөх таван жилийн хугацаанд бондын өгөөж 6.14 хувьтай байв. Ийнхүү бондын өгөөж буурснаар нэг тэрбум долларын зээлд төлөх хүүгийн хэмжээ жил бүр 15.4 сая ам.доллараар буурсан байна. АНУ-ын Төв банк зээлийн хүүг түүхэн доод хэмжээнд хүргэснээс гадна 5.16 их наяд ам.долларын бонд гаргаж бэлэн мөнгөний хэмжээг нэмэгдүүлсэн зэрэг нь компаниудад ихээхэн дэмжлэг болжээ. Цинциннатид төвтэй “Kroger” компанийн санхүү хариуцсан захирал Майкл Склотман "Төв Банкны бондын хөтөлбөр эдийн засагт ихээхэн дэмжлэг болсон. Магадгүй зарим компаниудыг дампуурахаас сэргийлсэн байх. Яагаад гэвэл компаниудын төлөх хүү ихээр буурсан" гэж мэдэгдсэн байна. АНУ-ын Холбооны нөөцийн банк хүүгийн хэмжээг тэгтэй ойролцоо түвшинд барьснаас гадна 2008 оны 12 дугаар сараас хойш гурван их наяд гаруй ам.долларын бондыг худалдан авсан байна. Ингэснээр “Apple”, “Verizon” тэргүүтэй хоёр мянга гаруй компанийн хүүгийн төлбөрт төлөх мөнгө 632 тэрбум ам.доллараар буурчээ. Энэ нь Швейцарийн дотоодын нийт бүтээгдэхүүнийг давсан үзүүлэлт болж байна.

Э.Анхбаяр

Холбоо барих: ankhbayar.e@bloombergtvmongolia.com

minjma.g@bloombergtvmongolia.com