“COVID-19”-ээр өвчилсөн, нас барсан хүний тоог нуун дарагдуулсан гэх АНУ-ын тагнуулын байгууллагын мэдээллийг БНХАУ-ын эрх баригчид үгүйсгэж байна.

Энэ гүтгэлэг нь АНУ-ын улстөрчид цар тахлаас сэргийлэхдээ хойрго хандсан алдаагаа бусдад тохох гэсэн оролдлого гэж хариу мэдэгдэл хийжээ.

БНХАУ-ын Гадаад хэргийн яамны төлөөлөгч "Бид АНУ-д өөрийн боломжоор тусалж, дэмжлэг үзүүлэхийг эрмэлзэж байгаа. Гэтэл АНУ-ын улстөрчид ичгүүргүй мэдэгдэл хийж, цаг алдаж байна" гэж онцолсон байна.

Албан ёсны бүртгэлээр АНУ-д БНХАУ-аас бараг гурав дахин олон хүн “COVID-19”-ийн халдвар аваад байгаа юм. Нас баралтын тоо ч хоёр дахин өндөр түвшинд хүрэхэд ойртжээ.

Лхагва гарагт АНУ-ын дэд Ерөнхийлөгч Майк Пенс “CNN”-д өгсөн ярилцлагадаа "БНХАУ илүү ил тод байсан бол бэлтгэлээ илүү сайн хангах байлаа" гэсэн байна.

Мөн "Өнгөрсөн оны 12 дугаар сард БНХАУ-ын эрх баригчид Дэлхийн эрүүл мэндийн байгууллагад хандахаас бараг нэг сарын өмнөөс халдвар дэгдсэн нь ил болсон" гэж онцолсон юм.

Б.Дашням | @Dashnyam_tsahir

Холбоо барих: dashnyam.b@bloombergtvmongolia.com

minjma.g@bloombergtvmongolia.com