БНХАУ-ын COVID-19-ийг үл тэвчих бодлогоос шалтгаалан цахилгаан автомашины зах зээлийн өсөлт удааширч магадгүй байна.

Тухайлбал: Шанхай хот сүүлийн хоёр сар гаруйн хугацаанд хөл хориотой байсан юм. Үүний нөлөөгөөр Шанхайд дөрөвдүгээр сард нэг ч автомашин борлуулагдаагүй байна.

2021 онд БНХАУ-д нийт 3.3 сая нэгж цахилгаан автомашин худалдаалагдсан аж. Энэ оны эхээр БНХАУ-ын Суудлын автомашины холбоо 2022 онд 5.5 сая нэгж цахилгаан автомашин борлуулагдана гэж тооцоолж байжээ. Харин одоогийн нөхцөл байдлыг харвал энэ үзүүлэлт буурах төлөвтэй байна.

Хөл хорионы улмаас үүссэн нийлүүлэлтийн сүлжээний доголдол, ажиллах хүчний хомсдолын улмаас цахилгаан автомашин үйлдвэрлэгчид бүрэн хүчин чадлаараа ажиллаж чадаагүй аж. Тухайлбал: БНХАУ-ын цахилгаан автомашин үйлдвэрлэгч “Xpeng” компанийн нийлүүлэлт дөрөвдүгээр сард гуравдугаар сарынхаас 42 хувиар буурчээ.

Түүнчлэн “Tesla”-ийн Шанхай дахь үйлдвэр дөрөвдүгээр сард ердөө 1500 гаруй нэгж цахилгаан автомашин нийлүүлсэн байна. Тус компани үйлдвэрлэлээ эрчимжүүлж, өдөрт 2100 нэгж автомашин үйлдвэрлэхээр зорьж байгаа аж.

БНХАУ-ын Засгийн газар шинэ автомашины борлуулалтыг нэмэгдүүлэхээр есөн тэрбум ам.долларын татварын хөнгөлөлт үзүүлэхээр болсон юм. Хэдий тийм боловч уг арга хэмжээ голлон уламжлалт хөдөлгүүртэй автомашинд чиглэхээр байгааг “Fitch Ratings” мэдээлжээ.

О.Цэнгэг |@TsengegO

Холбоо барих: tsengeg.o@bloombergtvmongolia.com

minjma.g@bloombergtvmongolia.com