Дэлхийн хоёр дахь том эдийн засаг БНХАУ-ын гадаад худалдааны тэнцэл наймдугаар сард 28.6 тэрбум ам.долларын ашигтай гарлаа. Энэ нь он гарснаас хойш хамгийн өндөр үзүүлэлт болж байгаа юм. Ингэснээр оны эхний найман сарын байдлаар гадаад худалдааны ашиг 154.2 тэрбум ам.долларт хүрээд байгаа нь өнгөрсөн оны мөн үеэс 28 хувиар өссөн үзүүлэлт боллоо гэж БНХАУ-ын Гаалийн ерөнхий газраас мэдээллээ. Түүнчлэн наймдугаар сард БНХАУ-ын экспорт өнгөрсөн оны мөн үеэс 7.2 хувиар буюу шинжээчдийн таамаглаж байснаас өндөр хувиар өссөн үзүүлэлттэй гарчээ. Харин импортын үзүүлэлт эсрэгээрээ шинжээчдийн таамагт хүрсэнгүй. Тус улсын импортын үзүүлэлт наймдугаар сард өнгөрсөн оны мөн үеэс долоон хувиар өсчээ. Ингэснээр сүүлийн хоёр улирал дараалан удаашраад байсан тус улсын эдийн засгийн өсөлт эргээд тогтворжиж эхэлж байгааг харуулж байна гэж шинжээчид үзэж байгаа юм. БНХАУ-ын Засгийн газраас жижиг бизнесүүдэд татварын хөнгөлөлт үзүүлэх, төмөр замын салбарын бүтээн байгуулалтыг дэмжих болон бусад эдийн засгийг дэмжих арга хэмжээнүүдийг авч хэрэгжүүлээд байна. Мөн тус улсын Төв банкнаас юанийн ханшийг тогтвортой барьж байгаа нь экспортлогчдод дэм үзүүлж байна гэж шинжээчдийн зүгээс онцолж байгаа юм. БНХАУ-ын Гаалийн ерөнхий газрын мэдээллээр, наймдугаар сард тус улсын худалдааны хамгийн том түнш АНУ болон Европын Холбоог чиглэсэн экспорт хоёр дахь сардаа дараалан өссөн байна. Үүнээс өмнө дөрвөн сар дараалан буурч байв. Харин Японыг чиглэсэн экспорт долоо дахь сардаа дараалан буурсантай зэрэгцээд Зүүн Өмнөд Азийн 10 улсыг чиглэсэн экспорт 30 хувиар өссөн нь нийт экспортын өсөлтөд зарим талаар нөлөөлснийг харж болохоор байна.

Б.Батманлай

Холбоо барих: batmanlai.b@bloombergtvmongolia.com

minjma.g@bloombergtvmongolia.com