АНУ-д шинэ төрлийн “коронавирус”-ийн халдварын тохиолдол 26.4 мянгаар, нас баралт 1047-оор нэмэгдлээ. Нас баралт Нью-Йорк, Нью-Жерсид сүүлийн гурав хоногт хоёр дахин өсөөд байна. Тус улсын Флорида муж иргэдээ гэрээсээ гарахгүй байхыг шаардаж эхэлжээ.

Цаашлаад нас баралт ирэх хэдэн долоо хоногт 100-240 мянга хүрч магадгүй гэж Цагаан ордон анхааруулаад байгаа юм. Үүний дараа Пентагоны талаас цэргийн зориулалт бүхий цогцос хадгалах 100 мянга орчим уут нийлүүлэхээр зорьж байгаагаа мэдэгдээд байна.

Түүнчлэн АНУ-ын Тагнуулын алба БНХАУ-ыг шинэ төрлийн “коронавирус”-ийн тархалтын цар хүрээг нуун дарагдуулсан гэж дүгнэсэн байна. Цагаан ордонд илгээсэн нууц тайландаа БНХАУ-ыг “COVID-19”-ийн халдвар болон нас баралтын тоог аль алийг нь бууруулж мэдээлсэн гэж онцолжээ.

Үүнээс гадна “COVID-19”-ийн тархалтын улмаас НҮБ-ын уур амьсгалын өөрчлөлттэй тэмцэх “COP26” олон улсын чуулга уулзалт хойшлогдлоо. Ирэх 11 дүгээр сард Шотландад зохион байгуулахаар төлөвлөсөн энэхүү арга хэмжээнд 26 мянга гаруй хүн оролцохоор төлөвлөөд байжээ. Мөн олон улсын теннисний “Wimbledon” тэмцээнийг VI, VII сард зохион байгуулахаар төлөвлөж байсныг нэг жилээр хойшлуулсан байна.

Дэлхийн хэмжээнд вирусийн халдварын 935.1 мянга, нас барсан 47.1 мянган тохиолдол бүртгэгдээд байна. Харин 193.9 мянган хүн эдгэрчээ. Шинэ төрлийн “коронавирус”-ийн халдварын тархалт огцом эрчимжиж байгаа талаар Дэлхийн эрүүл мэндийн байгууллага анхаарууллаа. Мөн нас баралт нэг долоо хоногт хоёр дахин нэмэгдсэнийг онцолжээ.

Францад нас баралт 4861-ээр буюу өмнө нь байгаагүй ихээр нэмэгдсэн бол Их Британид 31 хувиар нэмэгдэж, 2.3 мянга давжээ. Итали, Герман зэрэг орнууд хөл хорионы арга хэмжээгээ сунгахаар шийдвэрлэсэн байна. Европын Холбооноос бүсийн хэмжээнд цар тахлын нөлөөний улмаас компаниуд ажлын байр цомхотгохгүй байх төлөвлөгөө зарласан юм.

Япон улс гадаадаас ирж буй аялагчдад 14 хоног өөрсдийгөө тусгаарлах шаардлага тавьж байна. Түүнчлэн тус улс 70 гаруй улсаас зорчигч нэвтрүүлэхийг хоригложээ. Токиод халдварын тохиолдол өнгөрсөн 10 хоногт гурав дахин нэмэгдсэн аж. Тус улс халдварын дараагийн голомт болж болзошгүй байгаа юм байна.

Сүүлд ОХУ-ын Ерөнхийлөгчтэй уулзсан эмч шинэ төрлийн “коронавирус”-ийн халдвар авсан нь тогтоогдсоны дараа Владимир Путин бүх уулзалтаа алсын зайнаас хийж эхэлсэн байна.

Үүнээс гадна “Apple”-ийн гол түнш “Foxconn” компани 5G сүлжээ дэмждэг “iPhone”-ийг энэ намар танилцуулах төлөвлөгөө хэвээрээ гэж мэдэгдлээ. Хэдий цар тахлын үед аяллууд цуцлагдсан ч угсралтын анхны туршилтыг ирэх зургаадугаар сард явуулахаар төлөвлөсөн хэвээр байгаа юм байна.

Н.Номин-Эрдэнэ | @Nominerdene_NDN

Холбоо барих: nominerdene.n@bloombergtvmongolia.com

minjma.g@bloombergtvmongolia.com