Дэлхийн эдийн засгийн чуулганы хоёр дахь өдөр "Нэг бүс, Нэг зам" санаачилгын хүрээнд хэлэлцүүлэг явагдлаа. Энэ үеэр БНХАУ эдийн засгийн бодлогоо танилцуулжээ. Хэдийгээр энэ удаагийн чуулганд БНХАУ-ын Ерөнхийлөгч Ши Жиньпин оролцоогүй ч тус улс цаашид баримтлах эдийн засгийн бодлогоо танилцуулсан нь анхаарал татаж байна. БНХАУ өнгөрсөн оны 11 дүгээр сард танилцуулж байсан “Санхүүгийн салбараа илүү нээлттэй болгоно” гэсэн зорилтоо энэ удаагийн Давосын чуулганд дахин нэг удаа баталгаажууллаа. БНХАУ-ын Ерөнхийлөгч Ши Жиньпиний эзгүйд түүний эдийн засгийн зөвлөх, тус улсын Коммунист намын улс төрийн товчооны гишүүн Лью Хи БНХАУ-ын төлөөлөгчдийг ахлан оролцож байгаа юм. Тэрбээр "БНХАУ эдийн засгийн өндөр өсөлтөөс чанартай өсөлт, хөгжил дэвшилд хүрэхэд анхаарч байгаа"-г уламжилсан байна. Улмаар банк, санхүү, даатгал, үнэт цаасны зах зээлээ илүү нээлттэй болгосноор цаашид асар их боломж нээгдэнэ гэж харж байгаа ажээ. Гэхдээ энэ боломж зөвхөн БНХАУ-аар хязгаарлагдахгүй гэдгийг тэрбээр онцолсон байна. Энэ онд БНХАУ өөрчлөлт, шинэчлэлийн бодлого хэрэгжүүлж эхэлсний 40 жилийн ой тохиож байгаа аж. Үүний зэрэгцээ цаашид хөрөнгө оруулалтын таатай орчин бүрдүүлэх, Засгийн газар болон компаниудын өрийн хэмжээг бууруулахад анхаарна гэдгийг БНХАУ-ын төлөөлөгч мэдэгдэлдээ дурджээ.

БНХАУ-ын Ерөнхийлөгчийн эдийн засгийн зөвлөх Лью Хи "БНХАУ “Нэг бүс, Нэг зам” санаачилгын хүрээнд олон улсад даяаршлыг эрчимжүүлэхэд хүчин чармайлт гаргаж байна. Өнгөрсөн онд болсон Коммунист намын XIX бага хурлаар БНХАУ цаашид баримтлах эдийн засгийн бодлогоо тодорхойлсон. Энэ зорилтын хүрээнд БНХАУ дотооддоо болон дэлхийн бусад орнуудад хөгжил дэвшилд хүрэх боломжийг олгоно. Эдийн засгийн өндөр өсөлтөөс илүү, чанартай өсөлтөд анхаарал хандуулж байгаа. Мөн БНХАУ-ын Засгийн газар ойрын гурван жилийн хугацаанд өрийн хэмжээ өсөн нэмэгдэж байгааг бүрэн хяналтдаа авч, шийдвэрлэх болно. Үүний зэрэгцээ нийлүүлэлтэд суурилсан бүтцийн шинэчлэлээ эрчимжүүлнэ. Ойрын жилүүдэд БНХАУ эрсдэлээс урьдчилан сэргийлэх, ядуурлыг бууруулах, хүрээлэн буй орчны бохирдолтой тэмцэхэд онцгой анхаарал хандуулна. Энэ нь БНХАУ-ын өмнө тулгарч буй шийдвэрлэвэл зохих чухал асуудлууд юм" хэмээн мэдэгдсэн байна.

Б.Ариунболд

Холбоо барих: ariunbold.b@bloombergtvmongolia.com

minjma.g@bloombergtvmongolia.com