Азийн хөгжлийн банк цар тахлын эсрэг санхүүжилтээ гурав дахин нэмэгдүүлж, 20 тэрбум ам.доллар хүргэлээ. “COVID-19” цар тахлын эсрэг эхний ээлжид 6.5 тэрбум ам.долларын санхүүжилтийг гуравдугаар сарын 18-нд баталсан юм.

Цар тахлын нөлөөгөөр гишүүн орнуудад макро эдийн засаг, нийгмийн эрүүл мэндийн ноцтой хор хохирол учирсаар байгаа тул ийнхүү 13.5 тэрбум ам.долларын нэмэлт санхүүжилтийг шийдвэрлэсэн байна. Нийт 20 тэрбум ам.долларын санхүүжилтийн багцад хөнгөлөлттэй нөхцөлтэй болон буцалтгүй тусламжийн 2.5 тэрбум ам.долларын санхүүжилт багтаж байгаа юм байна.

Энэхүү шинээр баталсан санхүүгийн дэмжлэг нь Азийн хөгжлийн банкны мөчлөг сөрсөн дэмжлэгийн хүрээнд “COVID-19” цар тахлын эсрэг арга хэмжээний хөтөлбөрийг хамарч байгаа аж. Нийт санхүүжилтээс 13 орчим тэрбум ам.долларыг зөвхөн энэ хөтөлбөрийн санхүүжилтэд төсөвлөжээ. Ингэхдээ “COVID-19” цар тахлын сөрөг нөлөөг, ялангуяа хүн амын ядуу, эмзэг бүлэгт учруулж буй үр дагаврыг бууруулах зорилгоор хөгжиж буй гишүүн орнуудын Засгийн газраас хэрэгжүүлж байгаа мөчлөг сөрсөн бодлого, хөтөлбөрийг үр дүнтэй хэрэгжүүлэхэд дэмжлэг үзүүлнэ.

Батлагдсан 20 тэрбум ам.долларын санхүүжилтийн багцын хоёр тэрбум ам.долларыг хувийн хэвшлийг дэмжихэд зориулна. Худалдаа, нийлүүлэлтийн сүлжээг дэмжиж дахин сэргээх зорилгоор санхүүгийн байгууллагуудад зээл олгож, батлан даалт гаргана. Мөн цар тахлын нөлөөлөлд өртсөн хувийн хэвшил, төлбөрийн чадварын эрсдэлд орсон жижиг, дунд бизнес, үүний дотор эмэгтэй бизнес эрхлэгчдэд санхүүжилт, бичил зээл олгож, батлан даалт гаргах замаар дэмжлэг үзүүлэхээр төлөвлөжээ.

Э.Анхбаяр

Холбоо барих: ankhbayar.e@bloombergtvmongolia.com

minjma.g@bloombergtvmongolia.com