Өнөөдрийн байдлаар Монгол Улсад арилжааны 13 банк үйл ажиллагаа явуулж байгаа бөгөөд үүнээс долоо нь өнгөрсөн оны аудитаар баталгаажаагүй тайлангаа бүрэн болон бүрэн бус хэлбэрээр танилцуулаад байна. 2013 онд “Хаан” банкны татварын өмнөх ашиг нь өмнөх оноос 39.1 хувиар, “Хас” банкных 48.4 хувиар өссөн бол “Голомт” банкны ашиг дөрөв дахин нэмэгджээ. Харин “Эрэл” банкны ашиг 1.1 тэрбум төгрөг давсан бол “Худалдаа хөгжлийн банк”-ны татварын дараах ашиг 111.9 тэрбум төгрөг болсон талаар цахим хуудсандаа мэдээлсэн байна. Мөн 2013 онд банкуудын нийт актив хөрөнгө өмнөх оноос багаар бодоход 10 хувиар өссөн байгааг тайлангаас харж болох юм. Тухайлбал “Худалдаа хөгжлийн банк”-ны актив хөрөнгө 77.7 хувиар, “Голомт” банкных 47.7 ,харин “Хас” банкных 69.4 хувиар тус тус өсчээ. Үүнээс гадна Монголбанкнаас тогтоосон шалгуур үзүүлэлтийг ихэнх нь хангасан байна. Төлбөр түргэн гүйцэтгэх чадварын үзүүлэлт 25 хувиас багагүй байх ёстой бөгөөд “Хаан” банкных хамгийн өндөр буюу 47.7 хувь байгаа бол “Хас” банк, “Голомт” банкны төлбөр түргэн гүйцэтгэх чадварын үзүүлэлт 43.3-43.8 хувьтай байгаа ажээ. 

З.Энхболор 

Холбоо барих: enkhbolor.z@bloombergtvmongolia.com 

minjma.g@bloombergtvmongolia.com