АНУ-ын Хүнс, эмийн удирдах газар ирэх даваа гарагт “Pfizer”-ийн вакцины дархлаа сэргээх нэмэлт тунг 12-15 насныханд ашиглахыг зөвшөөрөхөөр төлөвлөж байна.

Үүнээс гадна тус байгууллага дархлаа тогтолцооны эмгэгтэй 5-11 насны хүүхдүүдийг гурав дахь тунд хамруулахаар судалж байгаа аж.

ОХУ-ын хувьд "коронавирус"-ийн халдварын улмаас 11 дүгээр сард хамгийн олон хүн нас барсан гэж тус улсын Ерөнхийлөгч Владимир Путин мэдэгдлээ. Тэрбээр цар тахлын нөлөөгөөр олон зуун хүнээ алдаад байгаа нь тус улсын ирээдүйд заналхийлж байгааг онцолжээ. 11 дүгээр сард тус улсад COVID-19-ийн халдварын улмаас 85 мянга гаруй хүн нас барсан байна. Өнөөдрийн байдлаар COVID-19-ийн шалтгаант нас баралт 625 мянга хүрээд байгаа аж.

Үүнээс гадна БНСУ олон нийтийн хөдөлгөөнийг хязгаарлах журмыг дахин 14 хоногоор сунгалаа. Энэхүү журам таваас дээш хүн цугларахыг хориглохоос гадна ресторан болон "кофе шоп" 21.00 цаг хүртэл ажиллах цагийн хязгаарлалт тавьж байна.

М.Аминаа

Холбоо барих: aminaa.m@bloombergtvmongolia.com

minjma.g@bloombergtvmongolia.com