Энэ оны гуравдугаар улиралд АНУ-ын эдийн засгийн өсөлт эрчимжсэн байна. Экспорт болон нөөцийн хэмжээ нэмэгдэж, орон сууцны салбарт өсөлт гарсан нь эдийн засгийн өсөлтөд голлох нөлөөг үзүүлжээ. Тус улсын Худалдааны яамнаас мэдээлснээр АНУ-ын эдийн засгийн жилийн өсөлт хоёрдугаар улиралд 2.5 хувь байсан бол гуравдугаар улиралд өсөлт 2.8 хувьд хүрсэн байна. Бараа материалын нөөцийн жилийн өсөлт 86 тэрбум ам.долларт хүрсэн нь гуравдугаар улирлын өсөлтийг 0.8 хувиар нэмэгдүүлжээ. Энэ нь өмнөх улирлаас хоёр дахин өндөр үзүүлэлт болж байна. Үүнээс гадна худалдааны алдагдал буурсан нь эдийн засгийн өсөлтийг 0.3 хувиар нэмэгдүүлжээ. Гэхдээ гуравдугаар улиралд иргэдийн худалдан авалтын өсөлт 2011 оноос хойшхи хамгийн доод хэмжээнд хүрсний зэрэгцээ компаниудын тоног төхөөрөмжид оруулах хөрөнгө оруулалт 3.7 хувиар буурсан байна. Үүнээс гадна АНУ-ын Хөдөлмөрийн Яам хөдөлмөрийн зах зээлийн үзүүлэлтүүдийг танилцууллаа. Өнгөрсөн долоо хоногт ажилгүйдлийн тэтгэмж авах хүсэлт гаргасан иргэдийн тоо буурсны зэрэгцээ хэрэглэгчийн итгэлийн индекс сүүлийн нэг жилийн хамгийн доод хэмжээнд мөн хүрчээ. Ажилгүйдлийн тэтгэмж авахаар анх удаа бүртгүүлсэн иргэдийн тоо есөн мянгаар буурч 336 мянга болсон нь АНУ-ын Засгийн газрын үйл ажиллагаа хэсэгчлэн зогссоны дараа ажлаас халагдсан иргэдийн тоо өсөөгүй гэдгийг харуулж байна. Харин “Блумберг”-ээс гаргадаг хэрэглэгчийн итгэлийн индекс 11 дүгээр сарын гуравны өдрөөр дуусгавар болсон долоо хоногийн хугацаанд хасах 37.6-аас хасах 37.9 болж доошилжээ. Тэгвэл энэ оны эхний хагаст АНУ-д сард дунджаар 195 мянган хүн шинээр ажилд орсон байна. Харин гуравдугаар улиралд энэхүү үзүүлэлт 143 мянга болж буурчээ. “Блумберг”-ийн судалгаагаар аравдугаар сард шинээр ажилд орсон иргэдийн тоо 120 мянга болж буурсан байж магадгүй байгаа ажээ. Төсвийн талаарх хууль тогтоогчдын санал зөрөлдөөн эдийн засагт сөргөөр нөлөөлснөөс гадна сүүлийн үед хөдөлмөрийн зах зээлийн өсөлт саарсан учраас Холбооны Нөөцийн Банк бонд худалдан авах хөтөлбөртөө өөрчлөлт оруулаагүй гэдгийг шинжээчид тайлбарлаж байна.

Э.Анхбаяр

Холбоо барих: ankhbayar.e@bloombergtvmongolia.com

minjma.g@bloombergtvmongolia.com