Өнгөрсөн сард АНУ-д түлшний үнэ өссөнтэй зэрэгцээд тус улсын амьжиргааны өртөг сүүлийн дөрвөн сарын хамгийн дээд түвшиндээ хүрч өссөн байна. Ингэснээр тавдугаар сард 0.1 хувиар өсөөд байсан АНУ-ын хэрэглээний үнийн индекс зургадугаар сард 0.5 хувиар өсчээ. Ихэнх шинжээчдийн хувьд дээрх үзүүлэлтийг 0.3 хувиар өснө гэж таамаглаж байсан юм. Ийнхүү хэрэглээний үнийн индекс өсөх болсон гол шалтгааныг түлшний үнэ 6.3 хувиар буюу сүүлийн дөрвөн сарын хамгийн дээд түвшиндээ хүрч өссөнтэй холбон тайлбарлаж байгаа аж. Харин хүнс болон түлшний үнийн өөрчлөлтийг оруулахгүйгээр тооцвол АНУ-ын хэрэглээний үнийн индекс 0.2 хувиар өссөн үзүүлэлттэй гарч байгаа нь шинжээчдийн таамагтай таарчээ. Ийнхүү 2012 оны эхний хагасаас 2013 оны зургадугаар сар хүртэлх жилийн хугацаанд тус улсын инфляци 1.8 хувьтай гарсан нь Холбооны нөөцийн банкнаас тавиад байсан зорилтот хэмжээнд дөхөж очсон байна. Үүнээс өмнө инфляци хэт доогуур байгаа нь Холбооны нөөцийн банкны зарим бодлого тодорхойлогчдын санааг зовоож байсан юм. Тухайлбал, Сент-Луисийн Холбооны нөөцийн банкны ерөнхийлөгч Жэймс Буллард инфляци хэт доогуур байгаагаас үүдэн үнэ буурч, улмаар энэ нь эдийн засгийн өсөлтийг бууруулах эрсдэл болж байгаад санаа зовж байгаагаа илэрхийлж байжээ. Үүнээс гадна өнгөрсөн сард АНУ-д үйлдвэрлэгдсэн автомашин, компьютерийн тоо өмнөх сараас нэмэгдсэнээр тавдугаар сард 0.2 хувийн өсөлттэй байсан тус улсын үйлдвэрлэлийн гарц өнгөрсөн сард 0.3 хувиар өссөн нь хоёрдугаар сараас хойшхи хамгийн өндөр өсөлтөд тооцогдож байна. Энэ хэвээрээ тус улсын үйлдвэрлэлийн салбарын өсөлт үргэлжилбэл энэ нь оны хоёрдугаар хагаст эдийн засгийн өсөлтөд түлхэц болно гэж шинжээчид үзсэн байна.

Э.Анхбаяр

Холбоо барих: Ankhbayar.e@bloombergtvmongolia.com

Munkhjin.ts@bloombergtvmongolia.com