АНУ-ын Хөдөө аж ахуйн яам эрдэнэ шиш болон шар буурцгийн энэ жилийн ургацын төлвийг буурууллаа. Үүний дараа үр тарианы зах зээл дээр эдгээр түүхий эдийн ханш өссөн байна. Тус яамнаас тариалангийн бүсүүдэд явуулсан судалгаан дээр үндэслэн энэ жил фермерүүд нийтдээ 349 сая тонн эрдэнэ шиш хураан авна гэсэн тооцоо гаргажээ. Энэ нь 2012 оныхоос 28 хувиар ахиу үзүүлэлт ч гэсэн шинжээчид ургацын хэмжээг 355 сая тоннд хүрнэ гэж таамаглаж байсан юм. Харин хураан авах нийт шар буурцгийн хэмжээ 82.8 сая тонн байна гэж тооцоолсон нь шинжээчдийн таамгаас дутсан үзүүлэлт болж байна. АНУ-ын Хөдөө аж ахуйн яамны тооцоолсноор, дэлхийн улсуудын нийт хураан авах улаан буудайн хэмжээ энэ жил 705.4 сая тоннд хүрнэ гэсэн урьдчилсан таамгыг гаргажээ. Гэвч хэрэглээ үүнээс илүү буюу 706.8 сая тонн байх юм байна. Харин улаан буудайн нийлүүлэлтээрээ дэлхийд тэргүүлэгч БНХАУ-ын улаан буудайн импорт гурав дахин нэмэгдэж 9.5 сая тоннд хүрнэ гэсэн тооцоо гарчээ.

Э.Анхбаяр

Холбоо барих: ankhbayar.e@bloombergtvmongolia.com

minjma.g@bloombergtvmongolia.com