Өнгөрсөн 11 дүгээр сард АНУ-д шинэ орон сууцны борлуулалтын хэмжээ зах зээл дэх хүлээлтийг давсан байна. Энэ нь моргейжийн хүү өссөн ч орон сууцны салбар дахь өсөлт эрчимжиж байгааг илтгэсэн үзүүлэлт боллоо. Тус улсын  Худалдааны яамнаас мэдээлснээр 11 дүгээр сард шинэ орон сууцны борлуулалт 2.1 хувиар буурч, жилийн хугацаанд зарагдсан тоо нь 464 мянга болжээ. Ихэнх шинжээчид үүнээс бага буюу 440 мянга байна гэсэн таамгийг дэвшүүлээд байсан юм. Харин аравдугаар сард шинэ орон сууцны жилийн борлуулалт 474 мянга буюу 2008 оны долдугаар сараас хойшхи хамгийн өндөр хэмжээндээ хүрээд байсан юм. 11 дүгээр сард АНУ-д шинэ орон сууцны дундаж үнэ өнгөрсөн оны мөн үеэс 10.6 хувиар өсч 270 мянга 900 ам.доллар болжээ. Үүнээс гадна АНУ-ын үйлдвэрлэлийн салбарын үзүүлэлтийг танилцуулсан байна. Өнгөрсөн сард удаан эдэлгээтэй барааны захиалга шинжээчдийн таамгийн давсан дүнтэй гарсан талаар тус улсын Худалдааны яамнаас мэдээллээ. Энэ нь гуравдугаар улиралд тааруу байсан бизнесийн хөрөнгө оруулалтын хэмжээ эргээд нэмэгдэж байж магадгүйг харуулсан үзүүлэлт болж байна. Машин тоног төхөөрөмж зэрэг хамгийн багадаа гурван жил ашиглагддаг бараа бүтээгдэхүүний захиалгын хэмжээ аравдугаар сард 0.7 хувиар өсөөд байсан бол 11 дүгээр сард 3.5 хувиар өсчээ. Мөн цэргийн бус зориулалттай нисэх онгоцны захиалга 21.8 хувиар өссөний зэрэгцээ автомашины эрэлт нэмэгдсэн нь удаан эдэлгээтэй барааны захиалга нэмэгдэхэд нөлөөлсөн байна. Тухайлбал Чикагод төвтэй “Boeing” компани аравдугаар сард 79, 11 дүгээр сард 110 нисэх онгоцны захиалга хүлээн авснаа мэдэгджээ. 

Э.Анхбаяр 

Холбоо барих: ankhbayar.e@bloombergtvmongolia.com 

minjma.g@bloombergtvmongolia.com