Өнгөрсөн сард АНУ-д түлшний үнэ хямдарсантай зэрэгцээд инфляци хоёр дахь сардаа дарааллан буурлаа. Гуравдугаар сард 0.2 хувиар буураад байсан тус улсын хэрэглээний үнийн индекс дөрөвдүгээр сард 0.4 хувиар буурсан гэж АНУ-ын Хөдөлмөрийн яамнаас мэдээлсэн байна. Энэ нь инфляци хэмжээ 2008 оны 12 дугаар сараас хойш хамгийн ихээр буурсан үзүүлэлт болж байгаа бөгөөд эдийн засагчдын хувьд 0.3 хувийн уналтын хүлээлттэй байжээ. Жилийн үзүүлэлтээр нь авч үзвэл, дөрөвдүгээр сарын инфляци өнгөрсөн оны мөн үеийнхээс 1.1 хувиар өссөн байна. Дөрөвдүгээр сараас өмнөх нэг жилийн хугацаанд тус улсын гол нэрийн бараа, бүтээгдэхүүний үнэ 1.7 хувиар өссөн бол хүнсний бүтээгдэхүүний үнэ 0.2 хувиар нэмэгджээ. Харин өнгөрсөн сард түлшний үнэ өмнөх сараас 4.3 хувиар буурсан талаар энэ удаагийн мэдээлэлд онцолсон байна. Тухайлбал, гуравдугаар сард дунджаар 3.69 ам.доллар байсан нэг галлон шатахууны үнэ дөрөвдүгээр сард 3.55 ам.доллар болж буурсан байна. Цалингийн татварыг нэмэгдүүлсэн хэдий ч түлшний үнэ хямд байгаа нь айл өрхүүдийн санхүүд дэм болж байгаа аж. АНУ-ын Төв Банкны хувьд инфляцийг хоёр хувьд барихаар зорьж байгаа юм.

Ажилгүй америкчуудын тоо өслөө

Сүүлийн дөрвөн долоо хоногийн дунджаар АНУ-ын ажилгүй иргэдийн тоо 339 мянга гаруйд хүрч өмнөх сарынхаас тодорхой хэмжээгээр өсчээ. Түүнчлэн тус улсын дөрөвдүгээр сарын хэрэглээний үнийн индекс өмнөх сарынхаас 0.4 хувиар буурсан нь тун удахгүй дефляцид хүргэж магадгүй гэсэн таамгийг шинжээчдийн зүгээс дэвшүүлээд байгаа аж. Үүнээс гадна өнгөрсөн долоо хоногт ажилгүйдлийн тэтгэмж хүссэн америкчуудын тоо 32 мянгаар нэмэгдэж 360 мянгад хүрсэн нь сүүлийн нэг сарын хугацаанд хамгийн ихээр өссөн үзүүлэлт болжээ. Ийнхүү ажилгүй иргэдийн тоо эрс нэмэгдсэн нь эдийн засгийн удааширлаас шалтгаалан аж ахуйн нэгжүүд олон тоогоор ажлын байрны цомхотгол хийж байгаатай холбоотой аж. Түүнчлэн өнгөрсөн сард АНУ-д шинээр эхэлсэн барилгын ажил өмнөх сарынхаас 16.5 хувиар буурсан ч шинээр олгогдсон барилгын зөвшөөрлийн тоо 2008 оны зургадугаар сараас хойш хамгийн дээд хэмжээндээ хүрчээ.  

А.Анхбаяр

Холбоо барих: ankhbayar.a@bloombergtvmongolia.com