Алтны 68 хувийн татвар мөрдөгдсөнөөс хойш Монгол Улсын хэмжээнд алтны олборлолт буурч, алтны худалдаа хууль бус хандлага руу шилжиж эхлээд байгааг шинжээчид анхааруулсаар байна. Энэхүү байдлыг засахын тулд хугацаа алдалгүй алтны худалдааг ил тод болгох нь зүйтэй гэж Монгол Улсын Засгийн газраас үзэж, хуулийн төсөл боловсруулжээ. Олборлосон алтыг худалдан авах, экспортлох, бүртгэл, тооцоо эрхлэхийг Монголбанкинд хариуцуулан цэгцлэх, мөн тусгай зөвшөөрөлтэй компани, бичил уурхайчдын олборлосон алтыг нэгдсэн журмаар авдаг системд шилжүүлэх, алт зуучлагчдын хууль бус далд наймааг зогсооход чиглэсэн зохицуулалтыг хуулийн төсөлд тусгасан байна. Түүнчлэн олборлосон алтыг Монголбанк болон арилжааны банкуудад худалдвал ашигт малтмалын нөөц ашигласны төлбөрийн доод хэмжээ таван хувь байсныг 2.5 хувь болгож бууруулах, мөн өсөн нэмэгдэх нөөц ашигласны төлбөрийг хүчингүй болгох зохицуулалтууд ч уг хуулийн төсөлд багтжээ. Хэрэв уг хууль батлагдвал жилд олборлох алт 20 тонноор нэмэгдэж, ирэх таван жилд 150 тонныг олборлох боломжтой гэсэн тооцоог шинжээчид гаргаад байна.

З.Энхболор

Холбоо барих: enkhbolor.z@bloombergtvmongolia.com

minjma.g@bloombergtvmongolia.com