Аравдугаар сард байгууллагын хадгаламжийн 41.3 хувийг гадаад валютын хадгаламж бүрдүүлж байна. Энэ нь өмнөх сараас 4.1 нэгж хувиар өссөн үзүүлэлт гэж Монголбанк мэдээллээ.

Харин байгууллагын зээлийн 37.2 хувийг гадаад валютын зээл бүрдүүлж байна. Энэ нь есдүгээр сараас 1.5 нэгж хувиар буурсан үзүүлэлт болжээ. Тайлант сард валютын зээлийн жигнэсэн дундаж хүү 10 хувь байна. Харин төгрөгийн зээлийн жигнэсэн дундаж хүү 17.6 хувь буюу 7.6 нэгж хувиар өндөр байгаа юм. "Өрхийн өр хэт нэмэгдэх, банкнуудын баланс дээрх долларжилт нэмэгдэх нь эдийн засгийг илүү эмзэг болгох эрсдэлтэй" гэж Монголбанкны Ерөнхийлөгч Н.Баяртсайхан онцолж байна.

Есдүгээр сарын Мөнгөний бодлогын шийдвэрийн хүрээнд санхүүгийн долларжилтыг бууруулахын тулд гадаад валютын зээлийн эрсдэлийн жинг 150 хувь болгож өсгөх шийдвэр гаргасан нь 2019 оны нэгдүгээр сарын нэгнээс хэрэгжиж эхэлнэ. Мөнгөний бодлогын мэдэгдэлд "Гадаад валютын орлогогүй, валютын ханшийн эрсдэлийг удирдах бололцоо хязгаарлагдмал иргэн, аж ахуйн нэгж, байгууллагад гадаад валютын зээл олгох нь өрийн дарамт, эдийн засгийн эмзэг байдлыг нэмэгдүүлнэ" гэж Төв банк дурджээ.

Салбараар нь авч үзвэл худалдаа, уул уурхай, барилгын салбарт гадаад валютын зээл бусад салбараас өндөр байна. Үүнээс худалдааны салбарт олгосон гадаад валютын нийт зээлийн 31 хувийг эзэлж байгаа нь оны эхнээс дөрвөн нэгж хувиар нэмэгдсэн үзүүлэлт юм.

X сарын байдлаар байгууллагын зээлийн 37.2 хувийг гадаад валютын зээл бүрдүүлжээ | BTVM ВИДЕО

Б.Бямбасүрэн

Холбоо барих: byambasuren.b@bloombergtvmongolia.com

minjma.g@bloombergtvmongolia.com