Үнэт металлын сорьцын хяналтын лабораторийг Дархан-Уул болон Баянхонгор аймагт нээж, үйл ажиллагааг нь аравдугаар сард эхлүүлэх болсныг Төв банк мэдээллээ. Ингэснээр иргэн, аж ахуйн нэгж олборлосон алтаа тухайн бүс нутагтаа сорьцлуулах боломжтой болж байна. Мөн алтны нийлүүлэлт нэмэгдэх боломжтойг Төв банк мэдээллээ. Лабораторийг байгуулахад 793.8 сая төгрөг төсөвлөгдсөн байна. Үүнээс 694 сая төгрөг нь тоног, төхөөрөмж худалдан авахад зарцуулагджээ. Монголбанк оны эхний найман сард 12.2 тонн алт худалдаж авсан нь өмнөх оны мөн үеэс төдийлөн өөрчлөгдөөгүй дүн болж байна. Хэдий тийм боловч оны эцэс гэхэд Төв банк худалдан авсан алтны хэмжээгээ өмнөх оны мөн үеэс 10 хувиар өсгөж, 22 тоннд хүргэхээр зорьж байгаа юм байна. Мөн энэ онд алт худалдан авалтаараа гадаад валютын албан нөөцийг 700 сая ам.доллараар нэмэгдүүлэхээр төлөвлөжээ.

Төв банк иргэд, аж ахуйн нэгжээс алтыг Лондоны Үнэт металлын биржийн ханшаар худалдан авдаг. Дэлхийн зах зээлд алтны спот ханш сүүлийн нэг жилд ес орчим хувиар унаж, өнөөдрийн байдлаар 1,204 ам.долларт тогтоод байгаа юм.

Б.Бямбасүрэн

Холбоо барих: byambasuren.b@bloombergtvmongolia.com

uyanga.m@bloombergtvmongolia.com