“Microsoft" корпораци хамгийн өргөн тархсан үйлдлийн систем болох “Windows 7"-доо дахин нэмэлт өөрчлөлт хийхгүй гэж мэдэгдлээ. Гэхдээ уг үйлдлийн системийн нэмэлт үйлчилгээний өргөтгөсөн хувилбарыгашигладаг хэрэглэгчид 2020 он хүртэл аюулгүй байдлын нэмэлт дэмжлэг авсаар байх юм байна. “Windows 7" үйлдлийн системийг хэрэглэгчдийн 56 хувь нь нэмэлт үйлчилгээний өргөтгөсөн хувилбарыг ашигладаг гэж “Microsoft" мэдэгджээ. Тус компани хэрэглэгчдээ аажим аажмаар “Windows 8.1" үйлдлийн систем рүү шилжүүлэх арга хэмжээг авч байгаа аж. Өнгөрсөн 11 дүгээр сард “Windows 7"-ийн биет борлуулалтыг зогсоосон ч “Windows 7" систем бүхий үйлдвэрийн тохиргоотой зөөврийн компьютерууд зах зээлд байсаар байгаа юм. “New Market Share" агентлагийн тооцоогоор дэлхийн нийт компьютерийн есөн хувь нь “Windows 8.1" үйлдлийн системийг ашигладаг бол 14 жилийн өмнө гарсан “Windows XP"-ийг үүнээс хоёр дахин олон компьютерт ашиглаж байгаа ажээ. Харин “Microsoft" корпорацийн гол өрсөлдөгч “Apple" компанийн үйлдлийн систем зах зээлийн таван хувийг бүрдүүлж байна.

Г.Ану

Холбоо барих: anu.g@bloombergtvmongolia.com

minjma.g@bloombergtvmongolia.com