АНУ-ын Канзас мужийн эрх баригчид “Westar Energy”-ийг 8.6 тэрбум ам.доллараар худалдаж авах “Great Plains Energy”-ийн саналыг эсэргүүцсэн байна. Албаныхан хэлцлийн үнийн дүнг хэт өндөр гэж үзсэн төдийгүй энэ нь хоёр компани нэгдсэний дараах санхүүгийн байдалд хүндээр тусна гэж дүгнэжээ. Харин “Great Plains Energy"-ийн удирдлагууд компаниуд нэгдсэнээр ирэх 10 жилд үйл ажиллагааны зардлаа хоёр тэрбум ам.доллараар хэмнэж, цахилгааны үнийг тогтмол түвшинд барих боломжтой гэж тооцоолжээ.

Sinclair Broadcast: “Tribune Media”-ийг худалдаж авахаар төлөвлөж байна

“Sinclair Broadcast” компани “Tribune Media” компанийн нэгж хувьцааг 30 ам.доллараар үнэлж, худалдаж авахаар төлөвлөж байгаа талаар эх сурвалж мэдээллээ. Талууд хэлэлцээрийг тавдугаар сарын наймны өдрөөс өмнө эцэслэх хүлээлттэй байна. “Sinclair Broadcast”-аас гадна “Nexstar” компани “Tribune Media”-д санал тавьсан талаар эх сурвалж онцоллоо. Хэдий тийм боловч компанийн хэмжээ, бизнесийн үйл ажиллагааны хувьд “Sinclair Broadcast” хамгийн зөв сонголт болсныг ажиглагчид онцолж байна. АНУ-ын хуулийн дагуу орон нутгийн телевизийн үйл ажиллагаа эрхлэгчийн зах зээлд эзлэх хувь нь 39 хувиас дээш гарах ёсгүй байдаг. Харин “Sinclair Broadcast”, “Tribune Media”-ийн нэгдэл энэ хязгаарт багтаж байгаа учраас холбогдох албанаас зөвшөөрөл авахад асуудалгүй гэж талууд үзэж байгаа юм.

"Taqa“ Хойд Америк дахь зарим бизнесээ худалдахаар төлөвлөжээ

Абу Дабигийн “Taqa“ компани Хойд Америк дахь зарим бизнесээ худалдахаар төлөвлөж байна. Өнгөрсөн хоёр жилд худалдан авалтын зардал нэмэгдэж, газрын тосны үнэ унасны улмаас “Taqa”-ийн алдагдал 2016 онд 5.2 тэрбум ам.долларт хүрчээ. Тиймээс зардал өндөртэй зарим бизнесээ худалдах чиглэл баримталж байгаа юм. Тус компанийн Гүйцэтгэх захирлын мэдэгдсэнээр “Taqa” компани цаашид Канадын Альберта дахь нүүрстөрөгчийн бизнест хийх хөрөнгө оруулалтаа нэмэхээр төлөвлөж байгаа ажээ.

Э.Эрдэнэтуяа

Холбоо барих: erdenetuya.e@bloombergtvmongolia.com

minjma.g@bloombergtvmongolia.com