“Volkswagen” компани хүлэмжийн хий ялгаруулалтын шалгуур үзүүлэлтэд тэнцээгүй автомашинуудаа ирэх нэгдүгээр сараас засварлаж эхлэх төлөвлөгөөтэй байна. Тус компанийн шинэ Гүйцэтгэх захирал Маттиас Мюллер "Хууль бус төхөөрөмж суулгасан бүх автомашиныг 2016 онд багтааж засварлана. Хууль зөрчсөн хэрэгт ердөө хэдхэн ажилчин буруутай" гэдгийг хэвлэлд өгсөн ярилцлагадаа онцолсон байна. Дэлхий даяар нийт 11 сая гаруй автомашинд хууль бус төхөөрөмж суурилуулснаа хүлээн зөвшөөрснөөр тус компанийн нэр хүнд, зах зээлийн үнэлгээ огцом унаад байгаа юм. Хэдий тийм боловч ойрын хугацаанд өдөр тутмын ажилд өөрчлөлт гарахгүй гэж тус компанийн ажилчдын зөвлөлийн тэргүүн мэдэгдлээ. “Volkswagen” компанийн Ажилчдын зөвлөлийн тэргүүн Бернд Остерло “Өнөөдөр шууд дүгнэлт өгөх эрт байна. Энэ алдаа дунд, урт хугацаанд манай ажилд хэрхэн нөлөөлөхийг хэлэхэд бэрх байна. Сайн мэдээ нь одоогоор үндсэн болон цагийн ажилчдын өдөр тутмын ажил өөрчлөгдөхгүй. Ажилчдын зөвлөл нөхцөл байдлыг нарийн ажиглана. Цөөн хэдэн удирдах тушаалтнуудын алдаа ажилчдын нуруун дээр ачаа болон буух ёсгүй” гэж мэдэгджээ.

Б.Дашням

Холбоо барих: dashnyam.b@bloombergtvmongolia.com

minjma.g@bloombergtvmongolia.com