Жиргээчдийн жиргэх тэмдэгтийн хязгаарлалт багасаж магадгүй байна. Учир нь “Twitter” рүү оруулж байгаа жиргээний 140 тэмдэгтэд зураг болон холбоосыг тооцдог байсныг хүчингүй болгох гэж байгаа аж. Өөрчлөлт ирэх хоёр долоо хоногт хийгдэж дуусна гэж ойрын эх сурвалж мэдээллээ. “Twitter”-т нийтэлж байгаа холбоосыг автоматаар богиносгож харуулдаг ч нэг холбоос 23 тэмдэгт эзэлдэг бол зураг нийтлэхэд 24 тэмдэгт шаардлагатай байдаг. Зураг болон холбоосыг тэмдэгтийн хязгаарлалтаас чөлөөлснөөр текст бичих боломжтой 93 тэмдэгт эргээд 140 болж байгаа юм. Одоогоор жиргээчид урт текст оруулахын тулд дэлгэцийн зураг буюу screenshot-ийг зураг хэлбэрээр нийтлэх эсвэл дараалсан хэд хэдэн жиргээ оруулах зэргээр асуудлыг шийдэж байна. “Twitter” компанийн Гүйцэтгэх захирал Жак Дорси өнгөрсөн нэгдүгээр сард "Платформыг ашиглахдаа текст оруулах боломжийг нэмэгдүүлэхээр ажиллаж байгаа" тухай мэдэгдэж байсан юм.

Г.Ану

Холбоо барих: anu.g@bloombergtvmongolia.com

minjma.g@bloombergtvmongolia.com