Монгол Улсын Засгийн газар “Оюу Толгой” төслийн гүний уурхайн төлөвлөгөөг хүлээн зөвшөөрөхгүй байгаагаа илэрхийлсэн тухай “Turquoise Hill Resources”-ийн мэдэгдлийн дараа тус компанийн хувьцааны ханш Торонтод 19 хувиар буурчээ. Харин дараагийн өдрийн арилжаагаар бага зэрэг буюу дөрвөн хувиар сэргэж, 15.53 канад доллар болоод байна.

Үүнээс гадна “Саnaccord Genuity”-ийн шинжээч “Turquoise Hill Resources”-ийн хувьцааны ханшийн төлөвийг 18.5 канад доллар болгосноо бууруулж, 16.5 канад доллар болгосон байна.

“Rio Tinto”-ийн хувьцааны ханш мягмар гарагт Австралид нэг хүрэхгүй хувиар, Лондонд нэг гаруй хувиар буурчээ. Харин лхагва гарагийн арилжаа эхэлснээс хойш Австралийн Хөрөнгийн биржид бага зэрэг өсөж, 121.64 австрали доллар болсон байна.

“Оюу Толгой”-ийн гүний уурхайн төлөвлөгөөтэй холбоотой хэлэлцээ дахин эхэлж магадгүй байгаа нь төслийн санхүүжилт, хугацаатай холбоотой эрсдэлийг нэмэгдүүлж байгаа гэж “Morgan Stanley”-ийн шинжээч дүгнэжээ.

"Монгол Улсад татвар, рояалтигаас өөрөөр бэлэн мөнгөний урсгал орж ирэхгүй байгаа ийм үед Монгол Улсын Засгийн газар ийм байр суурь илэрхийлсэн нь тийм ч гэнэтийн биш байлаа" гэж “Bank of Nova Scotia”-ийн шинжээч хэлсэн байна.

Мөн “Financial Times” сонинд "Монгол Улсын Засгийн газар “Rio Tinto”-ийн төслийг зогсоохоор сүрдүүлж байна. Мөн Монгол Улсын Засгийн газар “Оюу Толгой” төслийн хөрөнгө оруулалтын гэрээг сайжруулах сонирхолтой байна" гэсэн байна. “Financial Times”-ийн нийтлэлд Монгол Улсын Засгийн газраас “Rio Tinto”-д явуулсан захидлын тухай дурдсан байна.

Харин “Rio Tinto” компани "Хувь нийлүүлэгчдийн хүртэх өгөөжийг нэмэгдүүлэх боломж нээлттэй хэвээр байгаа" гэж “Ройтерс” агентлагт байр сууриа илэрхийлсэн байна.

Т.Элиса | @elisa_elisat

Холбоо барих: elisa.t@bloombergtvmongolia.com

minjma.g@bloombergtvmongolia.com