TRQ: “Оюу Толгой”-ийн гүний уурхайн II босоо амны бүтээн байгуулалтын ажил дууслаа
“Оюу Толгой”-ийн гүний уурхайн II босоо амны бүтээн байгуулалтын ажил бүрэн дууссан талаар хөрөнгө оруулагч тал мэдээллээ.
10 метрийн диаметртэй энэхүү босоо ам нь гадаргаас 1300 метрийн гүнд хүрдэг байна. "Энэ бол Оюу Толгойн гүний уурхайн бүтээн байгуулалтыг урагшлуулах дэд бүтцийн ажлын чухал хэсэг" гэж “Turquoise Hill Resources” компанийн Гүйцэтгэх захирал Ульф Куеллмэнн мэдэгдлээ.
II босоо амаар 300 хүн, 60 тонн ачааг нэг дор тээвэрлэх боломжтой. Бүх хүчин чадлаараа ажиллах үед өдөрт 35 мянган тонн ачааг газрын гүнээс гадарга руу гаргах боломжтой юм. Ингэснээр гүний уурхайн бүтээн байгуулалтын логистик, ханган нийлүүлэлт зэрэгт шаардлагатай ачаа тээврийг хийх боломж бүрдэж байна.
Энэхүү мэдээлэлтэй зэрэгцээд “Turquoise Hill Resources”-ийн хувьцааны ханш Нью-Йоркийн Хөрөнгийн биржид 52 долоо хоногийн доод түвшнээсээ сэргэж, 3.5 хувиар өссөн байна.
Хэдийгээр ийнхүү гүний уурхайн бүтээн байгуулалтын ажил урагштай байгаа боловч уурхайн гүн дэх чулуулгийн тогтцоос болж анхны олборлолт эхлэх хугацааг 16-30 сараар хойшлуулж, хөрөнгө оруулалтын зардал 1.2-1.9 тэрбум ам.доллароор нэмэгдэх төлөвтэй байгааг хөрөнгө оруулагч тал мэдээлсэн юм. Эцсийн тооцооллыг ирэх онд гаргах юм байна. Гүний уурхайн одоогийн санхүүжилттэй холбоотой мэдээллийг “Оюу Толгой” ХХК-ийн Гүйцэтгэх захирал Армандо Торрес өнгөрсөн сард өгсөн юм.
“Оюу Толгой” ХХК-ийн Гүйцэтгэх захирал Армандо Торрес
Т.Элиса | @elisa_elisat
Холбоо барих: elisa.t@bloombergtvmongolia.com
minjma.g@bloombergtvmongolia.com
Холбоотой мэдээ
