Японы автомашин үйлдвэрлэгч “Toyota Motor" компани санхүүгийн жилийн ашгийн төлвөө түүхэн дээд хэмжээ болох 2.1 их наяд иенд хүргэж өсгөлөө. Энэ төлөв нь “Volkswagen" болон “General Motors"-ийн 2014 оны ашгийг нийлүүлснээс их дүн болохыг шинжээчид онцолж байна. Мөн “Toyota Motor"-ийн цэвэр ашиг санхүүгийн жилийн III улиралд 600 тэрбум иенд хүрч өссөн нь шинжээчдийн таамгийг давсан үзүүлэлт болжээ. Иенийн ханш суларснаар “Toyota Motor"-ийн олон улс дахь борлуулалт эрс өссөөр байгаа аж. Ялангуяа “Toyota Motor"-ийн “SUV" загварын автомашины эрэлт АНУ-д огцом нэмэгджээ. Тиймээс тус компани “RAV4", “Lexus RX" зэрэг автомашиныхаа үйлдвэрлэлийг нэмэгдүүлэхээр төлөвлөж байгаагаа мэдэгдэв. Үүнээс гадна “Toyota Motor" 2014 онд нийт 10.2 сая автомашин борлуулж, автомашины зах зээлд тэргүүлэх байр сууриа хэвээр хадгалж чаджээ. Гэхдээ тус компани өнгөрсөн онд БНХАУ-д 1.1 сая автомашин борлуулах зорилт тавиад байсан ч зорилтдоо хүрч чадаагүй байна. Ингэснээр “Toyota Motor" компани БНХАУ дахь борлуулалтаараа “Volkswagen" болон “General Motors"-ийн араас бичигдлээ.

О.Анударь

Холбоо барих: anudari.o@bloombergtvmongolia.com

minjma.g@bloombergtvmongolia.com