“Walt Disney Pictures”-ийн “Toy Story 4” хүүхэлдэйн кино нээлтээ хийсэн даруй “Box Office”-ийн жагсаалтыг тэргүүллээ. “Toy Story” цувралын дөрөв дэх кино болон гарч байгаа энэхүү бүтээл нь өнгөрсөн долоо хоногт Хойд Америкт 118 сая ам.долларын орлого олсон талаар “Comscore” мэдээллээ.

Харин олон улс дахь нийт орлого нь 238 сая ам.доллар хүрсэн байна. Энэ онд нээлтийн орлогоор тэргүүлж байгаа гурав дахь бүтээлээр нэрлэгдэж байгаа гэдгээрээ онцлог аж. Хэдийгээр жагсаалтыг орлогоороо тэргүүлсэн ч студийн өөрийн төлөвлөгөө, таамагт хүрээгүй байна. Энэхүү кино 200 сая ам.долларын зардлаар бүтжээ.

Мөн шинээр нээлтээ хийсэн “United Artists Releasing”-ийн аймшгийн төрлийн “Child's Play” кино 14 сая ам.долларын орлогоор жагсаалтыг удаалсан байна. 1988 онд гарч байсан киноны шинэ хувилбар болох энэхүү бүтээл нь 10 сая ам.долларын зардлаар бүтжээ.

Харин “Box Office”-т тав дахь долоо хоногтоо дээгүүр өрсөлдөж байгаа “Aladdin” кино энэ удаад 12.2 сая ам.долларын орлогоор жагсаалтын эхний гуравдугаарт багтсан байна. 183 сая ам.долларын төсвөөр бүтсэн “Aladdin”-ийн олон улс дахь нийт орлого 810 сая ам.доллароор хэмжигдэж байна.

Н.Номин-Эрдэнэ | @Nominerdene_NDN

Холбоо барих: nominerdene.n@bloombergtvmongolia.com

minjma.g@bloombergtvmongolia.com