“Tesla”-ийн ашиг таван улирал дараалан өсөж, дээд цэгтээ хүрлээ. Тус компанийн борлуулалт III улиралд өмнөх оны мөн үеэс 39 хувиар өсөж, 8.8 тэрбум ам.доллар хүрсэн байна.

Үүнээс цэвэр ашиг нь 874 сая ам.доллар болж жилийн өмнөхөөс 156 хувиар, өмнөх улирлаас хоёр дахин өсжээ. Үүгээр шинжээчдийн таамгийг давсан байна.

Мөн олон улсын авто зах зээлд борлуулалт тааруу байгаа энэ үед тус компани хагас сая автомашин борлуулахаар төлөвлөсөн хэвээр байгаагаа албан мэдэгдэлдээ дурджээ. Цар тахлаас үүдэн Калифорнийн Фримонт дахь гол үйлдвэр нь түр хааснаас энэ төлөвлөгөө биелэх эсэх нь эргэлзээтэй байсан аж. Хэдий тийм боловч Шанхайн үйлдвэрийн гарц нэмэгдсэн, мөн “Model Y” загварыг олон тоогоор үйлдвэрлэх болсноо “Tesla” онцолжээ.

Үүний дараа “Tesla”-ийн хувьцааны ханш 4.5 хувиар өссөн байна. Энэ үзүүлэлт он гарснаас хойш 405 хувиар өсөж, зах зээлийн үнэлгээ нь 208 тэрбум ам.доллар хүрчээ. Тус компани долоодугаар сард үнэлгээгээрээ дэлхийд тэргүүлэгч автомашины компани болсон юм.

“LMC Automotive”-ийн тооцоолсноор энэ онд дэлхийн хэмжээнд автомашины нийлүүлэлт өмнөх оноос 22 хувиар буурах төлөвтэй байна.

Н.Номин-Эрдэнэ |@Nominerdene_NDN

Холбоо барих: nominerdene.n@bloombergtvmongolia.com

minjma.g@bloombergtvmongolia.com