Кристофер Ноланы бүтээл "Tenet" кино Хойд Америкийн “Box Office”-ийн жагсаалтыг дөрөв дэх долоо хоногтоо дараалан тэргүүллээ. “Rotten Tomatoes”-ийн кино шүүмжлэгчдээс 6.9 буюу нэлээн өндөр үнэлгээ авсан энэхүү кино өнгөрсөн долоо хоногт 3.4 сая ам.долларын орлого олжээ.

Улмаар нийт орлого нь 283 сая ам.доллар давсан байна. "Tenet" кино энэ оны хамгийн өндөр орлого олсон дөрөв дэх бүтээлээр нэрлэгдэж байгаа юм.

Харин БНХАУ-д найруулагч Петер Чаны “Leap” кино үзэгчдийг байлдан дагуулж байна. Тус улсын Үндэсний волейболын эмэгтэй шигшээ багийн тухай энэхүү кино нээлтээ хийсэн гурав хоногт 24.6 сая ам.долларын орлого олсон талаар “Maoyan” мэдээллээ. БНХАУ-ын Засгийн газар хязгаарлалтын арга хэмжээгээ зөөлрүүлж кино театруудын нийт тасалбарынхаа 50 хувийг худалдах эрхийг 75 хувь болгож нэмэгдүүлсэн нь кино театруудын орлогыг дэмжиж байна.

“Mulan” кино 20 гаруй улсад 3.3 сая ам.долларын орлого олж, олон улсын нийт орлого нь 64.4 сая ам.доллар хүрчээ. БНХАУ, Ойрх Дорнод, ОХУ-д харьцангуй өндөр үзэлттэй байна. Израил тэргүүтэй орнуудад хөл хорионы шинэ хязгаарлалт тогтоосноос үүдэн нээлт нь хойшилжээ. Энэхүү кино 200 сая ам.доллар буюу нэлээн өндөр зардлаар бүтсэн байна.

Н.Номин-Эрдэнэ | @Nominerdene_NDN

Холбоо барих: nominerdene.n@bloombergtvmongolia.com

minjma.g@bloombergtvmongolia.com