Өмнөговь аймагт байрлах Овоот толгойн ордод үйл ажиллагаа явуулдаг “SouthGobi Resources" компани IV улирлын санхүүгийн тайлангаа танилцууллаа.Тайлант хугацаанд тус компани нийт 210 мянган тонн нүүрс олборлож, 370 мянган тонн нүүрс борлуулсан байна. Ингэснээр 2014 оны нүүрсний борлуулалт нь 2.04 сая тонн буюу 2013 оны нийт нүүрсний борлуулалтаас нэг сая тонноор буурчээ. Санхүү үйл ажиллагааны тайланд дурдсанаар “SouthGobi Resources" компани нүүрсний үнийн уналт эрчимтэй үргэлжилсэн энэ үед борлуулалтын гэрээний шаардлагаа биелүүлэхийн тулд нөөцөөсөө борлуулалт хийсэн байна. Нэгдүгээр сарын 15-ны байдлаар тус компанийн мөнгөн хөрөнгийн үлдэгдэл 4.5 сая ам.доллар болжээ. Мөн хөрөнгө оруулалтын нэмэлт эх үүсвэр хайсан хэвээр байгаагаа мэдээллээ. БНХАУ-ын хөрөнгө оруулалтын корпорациас эргэлтийн хөрөнгөө санхүүжүүлэх зорилгоор авсан зээлийн төлбөрийг хийснээр тус компанийн мөнгөн хөрөнгийн үлдэгдэл ийнхүү буураад байгаа ажээ.

О.Одгэрэл

Холбоо барих: odgerel.o@bloombergtvmongolia.com

minjma.g@bloombergtvmongolia.com