“Rio Tinto” компани ган үйлдвэрлэлээр дэлхийд тэргүүлэгч БНХАУ-ын “China Baowu Steel” компанид ирэх хоёр жилийн хугацаанд хүлэмжийн хийн ялгаруулалт багатай ган үйлдвэрлэлийн төслүүд хэрэгжүүлэхэд 10 сая ам.долларын хөрөнгө оруулахаар болсон байна.

Энэхүү хөрөнгө оруулалтаар ган үйлдвэрлэлийн хүлэмжийн хийн ялгарлыг бууруулах чиглэлд хамтарсан судалгааны төв байгуулах юм. Эхний ээлжид төмрийн хүдэр боловсруулах явцад ялгарч буй хүлэмжийн хийн хэмжээг бууруулахад төвлөрч ажиллах юм байна. Энэхүү ажлын хүрээнд төмрийн хүдэр боловсруулах хоёр туршилтын үйлдвэр байгуулна. Үүний нэг нь биомасс, нөгөө нь богино долгионы технологийг ашиглахаар байгаа юм.

БНХАУ-ын Ерөнхийлөгч Ши Жиньпинь 2060 он гэхэд тус улсын хүлэмжийн хийн ялгарлыг байгальд учруулах нөлөөллийг нь тэглэнэ гэж мэдэгдээд байна. Харин “Rio Tinto” 2050 он гэхэд хүлэмжийн хийн ялгарлыг бүрэн саармагжуулж, уур амьсгалын өөрчлөлттэй тэмцэх ажилд нэг тэрбум ам.доллар зарцуулна гэж төлөвлөөд байгаа юм.

Б.Батцэцэг

Холбоо барих: battsetseg.b@bloombergtvmongolia.com

minjma.g@bloombergtvmongolia.com