Жил бүр уламжлал болон зохион байгуулагддаг Женевийн “Авто шоу” ирэх пүрэв гарагт буюу гуравдугаар сарын 3-ны өдөр эхлэх гэж байна. Энэхүү шоуны үеэр автомашин үйлдвэрлэгчид шинэ загваруудаа олон нийтэд танилцуулдаг уламжлалтай. Женевийн “Авто шоу”-ны албан ёсны нээлтээс өмнөхөн 2016 оны Европын “Шилдэг автомашин”-ыг тодрууллаа. 2016 оны “Шилдэг автомашин”-аар “Opel” брэндийн “Astra” загвар шалгарсан байна. Өнгөрсөн оноос худалдаанд гарсан энэхүү автомашин нь салбартаа тэргүүлэгч “Volkswagen”-ийн “Golf” болон “Ford”-ийн “Focus” загваруудтай өрсөлддөг хэдий ч автомашины 60 сэтгүүлчийн саналаар тэднийг ардаа орхиж чаджээ. “Opel” компанийн Гүйцэтгэх захирал Карл Томас Нойманны хэлснээр шинэчилсэн “Astra” нь өмнөх загваруудаас илүү хөнгөн, зай ихтэй аж. 2015 онд худалдаанд гарснаасаа хойш 130 мянган ширхэг борлуулагдаад байгаа юм байна. “Opel” компани 1999 оноос хойш 18 тэрбум ам.долларыг алдсан аж. Тиймээс энэ онд эргэн ашигтай ажиллахад “Astra” загвар гол дэмжлэг болно гэж шинжээчид үзэж байна. Тус компанийн удирдлагууд ч мөн шинэ загвар нь “Opel”-ийн хувьд амжилтын эхлэл болж байгааг онцоллоо. Үүнээс гадна “Volkswagen” компанийн Гүйцэтгэх захирал Матиас Мюллер “Дизель хөдөлгүүр цаашид автомашины салбарт давамгайлсан хэвээр байна” гэж үзэж байгаагаа илэрхийлсэн байна. Хэдийгээр хорт хийн ялгаруулалтын улмаас хэрэглэгчид дизель хөдөлгүүрт итгэх итгэл нь алдарсан ч энэ бол хүлэмжийн хийг бууруулах хамгийн боломжит арга гэдгийг тэрбээр онцолжээ.

Э.Эрдэнэтуяа

Холбоо барих: erdenetuya.e@bloombergtvmongolia.com

minjma.g@bloombergtvmongolia.com