OPEC-ийн ээлжит уулзалт тодорхой шийдэлд хүрэлгүй өндөрлөлөө. Тус байгууллагын гишүүд болон ОХУ газрын тосны гарц танах шийдэлд хүрнэ гэсэн хүлээлт өндөр байсан ч талууд тохиролцоонд хүрч чадаагүй байна.

Газрын тосны зах зээл дэх нийлүүлэлтийн илүүдлийг бууруулахын тулд OPEC-ийн гишүүд болон ОХУ хамтран өдрийн гарцаа нэг сая баррелиар танах магадлалтай гэсэн таамаг байсан юм. Үүнээс 300 мянган баррелийг нь ОХУ-д оноох саналыг Саудын Арабын тал гаргасан боловч Моксва дээд тал нь 150 мянган баррелиар бууруулах боломжтой гэсэн байр суурийг илэрхийлсэн байна. Сүүлийн таван жилийн хугацаанд OPEC-ийн уулзалт анх удаа тодорхой шийдвэргүй хүрэлгүй өндөрлөлөө гэдгийг шинжээчид онцолж байна. ОХУ, АНУ, Саудын Араб зэрэг гол нийлүүлэгч орнуудад газрын тосны гарц өсөж байгаа, мөн АНУ-д нөөц нэмэгдэж байгаа гэсэн шалтгаанаар газрын тосны ханш өнгөрсөн 11 дүгээр сард 22 хувиар буурсан юм. Харин хоёр сарын өмнөхтэй харьцуулбал ханш 30 гаруй хувиар унаад байна.

OPEC болон ОХУ газрын тосны гарцыг танах тохиролцоонд хүрч чадсангүй гэсэн мэдээллийн дараа газрын тосны ханшид огцом хөдөлгөөн гарч Лондоны биржид брент ангиллын газрын тосны ханш таван хувиар давж унаад байна. 60 ам.долларт хэлбэлзэж байсан ханш буурч, 50 руу ороод байгаа юм.

М.Золбоо

Холбоо барих: zolboo.m@bloombergtvmongolia.com

minjma.g@bloombergtvmongolia.com