"Nova Terra" компани 50 мегаваттын хүчин чадалтай нарны цахилгаан станц байгуулах хамтарсан гэрээ байгууллаа. Энэхүү төсөлд "Nova Terra"-аас гадна Бангкокт төвтэй "Symbior Energy" компани хамгийн багадаа 100 сая ам.долларын хөрөнгө оруулалт хийхээр төлөвлөж байна. Нарны цахилгаан станцын бүтээн байгуулалтийн эхний хэсэг 2018 оны эхний хагаст ашиглалтад орох тооцоотой байгааг "Nova Terra" компаниас мэдээлсэн юм. Өнгөрсөн долоо хоногт Дархан-Уул аймагт 10 мегаваттын хүчин чадалтай, жилд 15.4 сая КВт-цаг эрчим хүч үйлдвэрлэх нөөц бололцоотой Нарны цахилгаан станц нээлтээ хийгээд байна. 19.7 сая ам.долларын хөрөнгө оруулалтаар барьсан энэхүү станцыг төвийн шугам сүлжээнд холбосноос гадна хөрөнгө оруулалтын зардлын 80 хувийг Японы "Shijemitsu Shoji" компани гаргажээ.

Монгол Улсын хувьд ойрын хугацаанд 8-50 мегаваттын нийт 247 мегаваттын хүчин чадал бүхий нарны цахилгаан станц байгуулах 13 тусгай зөвшөөрлийг олгосон талаар Эрчим хүчний зохицуулах хороо мэдээлж байна. Монгол Улс сэргээгдэх эрчим хүчний нөөц баялагтай боловч цахилгаан станцууд байгуулахад шаардагдах зардлаа эргэн нөхөх боломж нь хугацаа их шаардаж байна. Тухайлбал, Дархан-Уул аймаг дахь 10 мегаваттын цахилгаан станц өртгөө нөхөхөд 12 жил зарцуулна гэж албаны эх сурвалж мэдээллээ.

Т.Элиса

Холбоо барих: Elisa.t@bloombergtvmongolia.com

Tsatsralt.b@bloombergtvmongolia.com