АНУ-ын Детройт хотод болж байгаа автомашины үзэсгэлэнгийн үеэр “Mercedes Benz" компани хоёр шинэ загвараа танилцууллаа. “Mercedes Benz"-ийн шинэ загвар болох “Mayback S600" седан нь 12 цилиндртэй, 523 морины хүчин чадалтайн дээр таван секундэд 96.5 км/цаг хүртэл хурдлах чадалтай юм байна. Харин “AMG GLE 63S" загвар нь “BMW"-ийн “X6" загвартай төстэй, дөрвөн хаалгатай, урд тал урт загвартай аж. Хүчин чадлын хувьд “Mayback S600"-аас илүү буюу 577 морины хүчтэйн дээр 5.5 литрийн багтаамжтай найман цилиндртэй хөдөлгүүртэй юм байна. Хүчин чадал өндөртэй машинуудаас гадна хүрээлэн буй орчинд ээлтэй, цахилгаан автомашинууд Детройтын авто шоунд ихээр тавигджээ. Тухайлбал “Chevrolet" компани “Bolt EV" консепт загвараа танилцуулсан нь оролцогчдын анхаарлыг ихэд татаж байна. Уг машин нэг удаагийн бүрэн цэнэгээр 200 миль буюу 322 километр зам туулах чадвартай ажээ. Энэ нь одоо зах зээлд байгаа “Volt Hybrid"-аас 38 милиэр, “Volt" загвараас 50 милиэр их байна. Детройтын авто шоу ирэх ням гараг буюу энэ сарын 25-ныг дуустал үргэлжилнэ.

Г.Ану

Холбоо барих: anu.g@bloombergtvmongolia.com

minjma.g@bloombergtvmongolia.com