“Walt Disney Pictures”-ийн бүтээл фантаз, адал явдалт "Maleficent: Mistress of Evil" кино нээлтээ хийсэн даруй “Box Office”-ийн жагсаалтыг тэргүүллээ.

2014 онд анх дэлгэцнээ гарсан "Maleficent” буюу "Хар шидтэн" киноны шинэ анги өнгөрсөн долоо хоногт Хойд Америкийн кино театруудад 36 сая ам.долларын орлого олсон талаар “Comscore” мэдээллээ. Хэдий тийм боловч энэ нь студийн таамагт хүрээгүй бөгөөд өмнөх ангийнхаа нээлтийн орлогын тэн хагастай л тэнцэж байгаа аж. Гол дүрд нь нэрт жүжигчин Анжелина Жоли тоглосон энэхүү кино 185 сая ам.долларын зардлаар бүтсэн байна. Олон улсын орлого нь 153 сая ам.доллароор хэмжигдэж байна.

Харин “Warner Bros. Pictures”-ийн бүтээл сэтгэхүйн триллер төрлийн “Joker” кино 29.2 сая ам.долларын орлогоор жагсаалтыг удааллаа. “DC Comics”-ийн дүрээс сэдэвлэж, гол дүрд нь Хоакин Феникс тоглосон энэхүү кино 55 сая ам.долларын зардлаар бүтсэн, олон улсын орлого нь 737 сая ам.доллар давжээ.

Мөн шинээр нээлтээ хийсэн “Sony Pictures Releasing”-ийн бүтээл зомби, инээдмийн төрлийн “Zombieland 2: Double Tap” кино 26.7 сая ам.долларын орлогоор “Box Office”-ийн жагсаалтын гуравдугаарт багтжээ. 10 жилийн өмнө гарч байсан “Zombieland”-ийн шинэ анги болох энэхүү кино нь 50 орчим сая ам.доллароор бүтсэн байна. “Zombieland 2: Double Tap”-ийн олон улсын орлого 5.3 сая ам.доллар байна.

Н.Номин-Эрдэнэ | @Nominerdene_NDN

Холбоо барих: nominerdene.n@bloombergtvmongolia.com

minjma.g@bloombergtvmongolia.com