Засгийн газрын ээлжит хуралдаанаар “Улаан” түвшинд буюу бүх нийтийн бэлэн байдлын зэрэгт шилжүүлэхгүй гэж шийдвэрлэлээ. Харин дөрөвдүгээр сарын 03-18-ны өдрүүдэд улсын хэмжээнд зарим салбарын үйл ажиллагааг хязгаарлах Улсын онцгой комиссын саналыг дэмжжээ.

Дээрх хугацаанд:

• Ресторан, лоунж, саун, бассейн, алжаал тайлах төв, кино театр, үзвэр үйлчилгээ, бялдаржуулах төв, амралт сувилал, сургалтын төв ажиллахгүй

• Хоол үйлдвэрлэл, зоогийн газрууд хүргэлтээр үйлчлэх

• Үсчин, гоо сайхны газрууд амралтын өдрүүдэд ажиллахгүй, бусад өдөр халдвар хамгааллын дэглэм сахиж ажиллах

• Худалдаа, үйлчилгээний газрууд хүн хоорондын зай бариулах, ариутгал, халдваргүйжүүлэлтээ дээд зэргээр хийх, нийт талбайнхаа 30 хувиас хэтрэхгүй байхаар тооцон үйлчлэх

• “Нарантуул”, “Хархорин”, “Барс”, “Хүчит шонхор”, “Нарантуул-2” зэрэг томоохон зах, худалдааны төв 30 хувиар ажиллах /амралтын өдрүүдэд ажиллахгүй/

• Дэлгүүр, худалдааны төвүүд 20.00 цагт хаах

• Аймаг, орон нутаг руу зорчих иргэдийн хөдөлгөөнийг хүндэтгэх шалтгаанаас бусад тохиолдолд хориглох

• Орон нутаг руу хүнс, ачаа тээвэр, малын өвс тэжээл, шатахуун тээврээс бусад тохиолдолд автомашины хөдөлгөөнийг хязгаарлахаар боллоо.

Мөн тодорхой зохицуулалт хийх зорилгоор нэг дор таваас дээш хүн цуглахгүй байх зохион байгуулалтыг бүх шатанд хэрэгжүүлэх, 60-аас дээш настай ахмадуудыг шаардлагагүй тохиолдолд гэрээс гарахгүй байхыг сануулах, Төрийн болон хувийн хэвшлийн байгууллага нийт ажилтан, албан хаагчдынхаа 30-аас ихгүй хувийг ажиллуулах, хорио цээрийн дэглэмийн хэрэгжилтийг сахиулах ажлын хэсэг байгуулахаар төлөвлөсөн байна.

Түүнчлэн ойрын хавьтлыг олж тогтоох тандалт судалгааг эрчимжүүлэх, гадаадаас ирэх иргэдийн тусгаарлалтыг долоо хоног болгох, тусгаарлах байранд эмчлүүлж, эдгэрч гарсан иргэдийг долоо хоног гэрээр ажиглахыг цуцлах, мөн тавдугаар сарын нэгний өдрөөс өмнө нийслэлийн нэг сая иргэнийг, долоодугаар сарын нэгэн гэхэд орон нутгийн иргэдийг дархлаажуулж дуусгахаар төлөвлөжээ.

Холбоо барих: minjma.g@bloombergtvmongolia.com