Японы олон улсын хамтын ажиллагааны байгууллага буюу “Жайка”-ийн хөнгөлөлттэй зээлийн хөрөнгөөр Дулааны IV цахилгаан станцын үр ашгийг дээшлүүлж, технологийн шинэчлэл хийх төслийг Монгол Улсын Засгийн газраас боловсруулаад байна. Засгийн газраас боловсруулсан саналын дагуу зээлийн санхүүжилт жилийн 0.3 хувийн хүүтэй, 40 жилийн хугацаатай байх ажээ. Харин санхүүжилтийн нийт хэмжээ өнгөрсөн гуравдугаар сард Япон улсын Ерөнхий сайд Шинзо Абэгийн мэдэгдэж байснаар 4.2 тэрбум иен буюу 42.5 сая ам.доллар байх юм байна. Монгол Улсын эрчим хүчний хэрэглээ дараагийн таван жилд тогтмол 5-7 хувийн өсөлтөө хадгалах хандлагатай байгаа нь IV цахилгаан станцыг шинэчлэх шаардлагыг бий болгож байгаа юм.Төвийн бүсийн эрчим хүчний хэрэглээний 70 хувийг дангаараа бүрдүүлдэг IV цахилгаан станцын шинэчлэлийн хүрээнд станцын зуухнуудад үнс үлээлгийн төхөөрөмж суурилуулж, хэрэглэх нүүрсний хэмжээг багасгах боломжтой болно. Мөн доголдол, зогсолтыг бууруулснаар турбиныг дахин асаахад хэрэглэдэг тослох мазутын хэрэглээг хэмнэх ажээ. Нийслэлийн эрчим хүчний хангамжийн зардлыг бууруулж найдвартай ажиллагааг ханган, нүүрсхүчлийн хийн ялгарлыг бууруулах энэ ажлыг 2013 онд эхлүүлж, 2017 онд дуусгахаар дээрх төсөлд заасан байна.

Б.Дуламхорлоо

Холбоо барих:dulamkhorloo.b@bloombergtvmongolia.com

minjma.g@bloombergtvmongolia.com