Оны эхний долоон сард төмөр замын ачаа тээвэр болон агаарын замын зорчигч тээвэр өссөн байна. 1-7 дугаар сар хүртэлх хугацаанд төмөр замаар нийт 12.1 сая тонн ачаа тээвэрлэсэн нь жилийн өмнөхөөс 12.7 хувиар өссөн үзүүлэлт юм. Төмөр замын нийт тээврийн 39 хувь нь дотоодод, 35.7 хувь нь экспорт, 11 хувь нь импорт харин үлдсэн 13.8 хувь нь дамжин өнгөрсөн тээвэр байсныг ҮСХ мэдээллээ. Энэ дундаас дамжин өнгөрсөн төмөр замын ачаа тээвэр өнгөрсөн оны мөн үеийнхээс 18.6 хувиар өссөн байна. БНХАУ, ОХУ-ын дунд орших газар нутгийн байршлын давуу талаа ашиглаж Монгол Улс транзит тээврээ өргөжүүлэхээр зорьж байгаа юм. Энэ дунд нефтийн транзит тээвэр ч багтаж байна. Өнгөрсөн тавдугаар сард ОХУ-аас түүхий нефть тээвэрлэсэн 48 вагон бүхий галт тэрэг Монголын нутгаар дамжин өнгөрч Замын-Үүд өртөөнд очсон. Энэ нь сүүлийн 12 жилийн хугацаан дахь анхны тохиолдол болсон юм. Үүнээс гадна тавдугаар сарын эхээр ОХУ-аас БНХАУ руу 42 мянган тонн түүхий нефть ачсан 480 вагон бүхий 10 галт тэргийг Монголын нутаг дэвсгэрээр дамжин өнгөрүүлэх захиалга өгсөн. Цаашдаа сар бүр 50 мянган тонн түүхий нефтийн транзит тээвэр хийхээр яриа, хэлцэл хийж байгаа талаар Зам тээврийн хөгжлийн яам өмнө нь мэдээлж байсан.

Харин төмөр замын тээврийн нийт орлого 288 тэрбум төгрөг болж жилийн өмнөхөөс 23.1 хувиар өсжээ. Зорчигч тээврийн тухайд, оны эхний долоон сард төмөр замаар давхардсан тоогоор 1.5 сая хүн зорчсон нь жилийн өмнөхөөс 2.3 хувиар буурсан үзүүлэлт боллоо. Агаарын тээврээр зорчигсдын тоо эсрэгээрээ 22 хувиар өсөж, 447.4 мянга болсон байна. Энэ оны хувьд, авиа компаниуд шинэ нислэгүүд үйлдэж эхэлсэн. "Хүннү эйр" компани энэ оны эхэнд ӨМӨЗО-ны Бугат руу тогтмол нислэг мөн зургадугаар сараас ОХУ-ын Улаан-Үүд рүү нислэг үйлдэж эхэлсэн. Түүнчлэн "Миат" компани хоёр жилийн хугацаатай түрээслэх "Бойнг 737-700" агаарын хөлгөө хүлээж авсан. Бизнес ангиллын 12, энгийн ангиллын 102 суудалтай тус хөлгийг нислэгийн шинэ чиглэлүүддээ ашиглаж эхэлсэн. Мөн тус компани зургадугаар сард БНСУ-ын Бусан хот руу долоо хоногт хоёр удаагийн нислэг үйлдэж эхэлсэн бол 11 дүгээр сараас Тайландын Бангкок руу нислэг хийхээр төлөвлөж байна.

Т. Элиса

Холбоо барих: elisa.t@bloombergtvmongolia.com

tsatsralt.b@bloombergtvmongolia.com