ХБНГУ-ын “Siemens” компани эрүүл мэндийн “Healthineers” нэгжийнхээ 15 хувийг анхдагч зах зээлд санал болгохоор төлөвлөж байна. Цаг хугацааны хувьд гуравдугаар сарын 16 гэсэн урьдчилсан тов гараад байгаа юм байна. “Siemens” компани “Healthineers”-ийн IPO-ийг гаргаснаар 3.9 тэрбумаас 4.65 тэрбум еврогийн хөрөнгө босгохоор тооцоолжээ. “Healthineers” компанийн нэгж хувьцааны үнэ нь 26-31 еврогийн үнэ хүрэх төлөвтэй байна.

“BLACKSTONE GROUP” ҮЛ ХӨДЛӨХ ХӨРӨНГӨӨ ХУДАЛДАНА

АНУ-ын хөрөнгө оруулалтын “Blackstone Group” Манхэттэнд байрлалтай 34 давхар оффисийн барилгыг үл хөдлөх хөрөнгийн “Savanna” компанид 640 сая ам.доллараар худалдахаар болсон гэж эх сурвалж мэдээлсэн байна. Сүүлийн хоёр жилийн турш Манхэттэний үл хөдлөх хөрөнгийн зах зээл уналттай байжээ. Тиймээс энэ удаагийн хэлцэл зах зээл эргэн сэргэж байна гэсэн эерэг дохиог хөрөнгө оруулагчдад өгнө гэж салбарын шинжээчид найдаж байгаа юм.

“KORIAN” БИЗНЕСЭЭ ХУДАЛДАХ СОНГОЛТУУДЫГ СУДАЛЖ БАЙНА

Эрүүл мэндийн үйлчилгээний “Korian” компани бизнесээ худалдах сонголтуудыг судалж эхэлсэн талаар ойрын эх сурвалж мэдээллээ. Одоогоор “Pai Partners”, “KKR” зэрэг хөрөнгө оруулалтын компаниуд сонирхож, санал тавиад байгаа юм байна. Хэдий тийм боловч санхүүгийн зөвлөх компаниудтай саналыг хэлэлцэх шатанд явж байгаа учраас хэлцэл хийгдэх эсэхийг хэлэхэд эрт байна гэж эх сурвалж онцолжээ. “Korian”-ийн зах зээлийн үнэлгээ 2.3 тэрбум еврогоор хэмжигддэг. Энэхүү мэдэгдлийн дараа тус компанийн хувьцааны ханш 9.8 хувиар өсөж, 29.26 еврод хүрчээ.