Парист болсон халдлагын дараа Франц улс зэвсэгт хүчний 10 мянган цэргээ сургууль, төмөр замын буудал, соёлын төвүүдийн орчимд эргүүлд гаргажээ. Мөн барьцааны үеэр амь үрэгдсэн дөрвөн хүн бүгдээрээ еврей байсан учир еврей сургуулиудын хамгаалалтыг чангатгасан байна. Үүнээс гадна аюулаас хамгаалах хүчний 15 мянган цэргийг онцгой бүсүүдэд байрлуулан хамгаалалтад авчээ. Халдлагын гол бай болсон “Charlie Hebdo" сэтгүүлийн хувьд зөнч Мухаммадыг шоглосон зураг бүхий дугаараа гурван сая хувиар хэвлэхээр төлөвлөсөн байна. Интернэтэд тавьсан дүрс бичлэгийн тусламжтай нэгдүгээр сарын 8-нд нэг цагдаагийн албан хаагч болон барьцааны дөрвөн хүнийг хөнөөсөн этгээд нь Амеди Коулибали гэгч болохыг тогтоожээ. Мөн дөрөв дэх сэжигтэн болох түүний эхнэр Хаяат Бумеддин нэг эрэгтэйн хамт Францаас зугтахдаа Стамбулын нисэх буудлаар дамжин өнгөрснийг гэрчлэх дүрс бичлэг олдсон байна. Тэрбээр нэгдүгээр сарын 2-нд Туркт нэвтрээд тав хоносны дараа буюу халдлага гарах үеэр Сири рүү гарсан байж магадгүй байгааг албаныхан мэдээлжээ. Ням гарагт болсон Эв нэгдлийн жагсаалын үеэр Парист уулзсан Европын орнуудын Дотоод хэргийн сайд нар Холбооны гадаад хилийн хяналтыг чангатгах, мэдээлэл солилцох талаар тохиролцоонд хүрсэн байна. Харин энэхүү жагсаалд дэлхийн 40 орчим орны дээд хэмжээний элч төлөөлөгчид хүрэлцэн ирсэн ч АНУ зөвхөн элчин сайдаа оролцуулсан нь шүүмжлэл дагуулаад байгаа юм. Үүнтэй холбогдуулж Цагаан ордны хэвлэлийн төлөөлөгч Жош Ирнест мэдээлэл хийжээ. Тэрбээр “АНУ Франц дахь Элчин сайдаасаа дээгүүр албаны төлөөлөгчийг Эв нэгдлийн жагсаалд илгээж болох байсан эсэх талаар асуулт гараад байгаа. Илүү өндөр хэмжээний төлөөлөгчөө илгээх ёстой байсан гэдэгтэй санал нэг байна. Ийм аюул заналтай тулгарч байгаа үед бид АНУ-ын ард иргэд болон манай засаг захиргаа Франц холбоотнуудаа дэмжиж байна" хэмээн мэдэгдсэн байна. Мөн ОХУ-ын Гадаад хэргийн сайд Сергей Лавров “Терроризмын эсрэг тэмцэл нь хувийн үзэл бодол болон хэн нь илүү вэ гэдгийг харуулах хүслээс хамаарах ёсгүй. Энэ нь нууц албад, зэвсэгт хүчин хууль хяналтын байгууллагын хамтын ажиллагаанд суурилах ёстой" гэж онцолжээ. Мөн халдлагатай холбогдуулж Лалын үзэл болон цагаачлалыг эсэргүүцсэн жагсаал цуглаан даваа гарагт Германы зүүн хэсгийн Дрезден хотод дахин боллоо. Парист болсон алан хядлагын улмаас “PEGIDA" хэмээх энэхүү хөдөлгөөнийг дэмжигчдийн тоо улам нэмэгдэх байх гэсэн болгоомжлол үүсээд байгаа юм.

Ц.Улам-Ундрах

Холбоо барих: ulamundrakh.ts@bloombergtvmongolia.com

minjma.g@bloombergtvmongolia.com