Их Британи 2019 онд Европын Холбоотой BREXIT-ийн хэлэлцээрт хүрч чадахгүй бол хагас сая ажлын байраа алдах тооцоог “Cambridge Econometrics” байгууллага гаргасан байна. Мөн хөрөнгө оруулалтын урсгал нь 2030 он гэхэд 68 тэрбум ам.доллараар буурна гэдгийг онцолжээ. Үүнээс гадна BREXIT-ийн хэлэлцээр хатуу нөхцөлөөр хийгдвэл Герман дахь автомашин үйлдвэрлэгчид 14 мянган ажлын байраа алдаж, борлуулалт нь 3.8 тэрбум еврогоор буурч магадгүй байгаа аж. Германы “Continental”, ”Robert Bosch” зэрэг компаниуд Их Британийн автомашины эд анги нийлүүлэлтийн 20 хувийг хангадаг байна. Лондоны санхүүгийн зах зээлд нээлттэй ажлын байрны тоо өнгөрсөн сард 52 хувиар буурч, сүүлийн гурван жилийн доод түвшиндээ хүрчээ. BREXIT-ийн хоёрдугаар шатны буюу худалдааны асуудлаарх яриа хэлэлцээ ирэх гуравдугаар сараас үргэлжилнэ. Энэ талаар Их Британийн Ерөнхий сайд “Сайн хэлэлцээрт хүрнэ” гэдэгт итгэлтэй байгаагаа мэдэгдлээ. Хэдий тийм боловч одоогоор хэлэлцээрийн үр дүн ямар ч тохиолдолд Их Британийн эдийн засагт сөргөөр нөлөөлнө гэсэн таамаг шинжээчдийн дунд давамгай байгаа юм.

Н.Номин-Эрдэнэ

Холбоо барих: nominerdene.n@bloombergtvmongolia.com

minjma.g@bloombergtvmongolia.com