Германы автомашин үйлдвэрлэгч “BMW” компанийн цэвэр ашиг 2015 онд 10 хувиар өсч, 6.4 тэрбум еврод хүрсэн байна. Түүнчлэн валютын хэлбэлзлийн нөлөөгөөр нийт борлуулалт нь 15 хувиар өсч, 92.2 тэрбум еврогоор хэмжигдэж байгааг тус компани лхагва гарагт танилцуулсан тайландаа дурджээ. Гэхдээ санхүүгийн үзүүлэлт сайн байгаагаас үл хамааран хувьцааны ханш нь лхагва гарагт 2 хувиар буурсан байна. Учир нь “BMW” ногдол ашгийнхаа хэмжээг 3.2 евро болгон нэмсэн нь хөрөнгө оруулагчдын хүлээлтэд хүрээгүй байна. Салбарын шинжээчид тус компанийн удирдлагууд ногдол ашгаа хангалттай хэмжээнд нэмээгүй нь програм хангамж тэргүүтэй голлох чиглэлүүдэд оруулах хөрөнгө оруулалтаа нэмэх зорилготой гэж таамаглаж байгаа аж. Тиймээс ирэх долоо хоногт танилцуулах “BMW”-ийн Гүйцэтгэх захирлын шинэ стратеги хөрөнгө оруулагчдын анхаарлын төвд ороод байгаа юм. Улс төр, эдийн засгийн тогтворгүй байдалд автомашин үйлдвэрлэгчдийн хувьд дарамт болох болсон бөгөөд тиймээс “BMW”, “Mercedes-Benz” зэрэг тэргүүлэх брэндүүд эрсдэлээ бууруулахын тулд өөрсдийн бодлого, стратегидаа хянамгай хандах болжээ. Ялангуяа ихэнх загварууд нь хуучирсан “BMW” брэндийн хувьд салбартаа тэргүүлэгчийн байр сууриа “Mercedes-Benz”-д алдах магадлалтай болоод байгааг шинжээчид анхааруулж байна.

Э.Эрдэнэтуяа

Холбоо барих: erdenetuya.e@bloombergtvmongolia.com

minjma.g@bloombergtvmongolia.com